Өрт – тілсіз жау

Балалардың қарапайым өрт қауіпсіздігі ережелерін білмеуі – өрттің шығуының негізгі себептерінің бірі. Өрттің алдын алу, ал бола қалған жағдайда өзін саналы ұстауы үшін №9 балабақшада тәрбиелік бағыттағы ойын-сауық шарасы өтті.

Мектепке даярлау топтарымен «Отпен ойнама! Отқа жақындама! Денсаулықтарыңды сақтаңдар!» тақырыбындағы іс-шара барысында балаларға өрттің алпауыт күш екені айтылып, оны жеңу үшін белгілі білім мен дағды болу керектігі түсіндірілді. Өрт қаупі төнген кезде балаларды бағдарлауға үйрету – педагогтердің міндеті.

Балаларға «Ұшқын» қонаққа келіп, оларға викториналық сұрақтар қойып, түрлі ойындар ойнады: «Кім жылдам өрт сөндіру қызметінің номерін тереді», «Өрт сөндіру», «Өрт дабылы», «Жануарларды құтқару» сияқты эстафеталық ойындар өте көңілді өтті. «Ұшқын» сауық соңында балаларды өрт сөндірушілер қатарына қабылдап, куәлік берді. Балалар ойын-сауық шарасы аясында көтеріңкі көңіл-күйде болды. Осындай өзекті тақырыпты бүлдіршіндерге жеңіл беру арқылы олардың өрт қауіпсіздігі ережелерін сақтауға бағытталған білімі терең болмақ.

Сания БАЙТИКЕНОВА,
№9 б/б тәрбиешісі,
Рудный қаласы