Асыға күткен мерейлі мереке

Выпуск - №35 (431)   :   04.09.2020
55

Педагогтер мен оқушылар асыға күтетін мереке – Білім күні. Жаңа оқу жылының басталуы, балаларға сапалы білім мен саналы тәрбие беруге деген ұмтылыс – бәрі-бәрі педагогтердің мойнына үлкен жауапкершілік жүктейді.

Оның жүректерге жарқын сәттер сыйлап, көтеріңкі көңіл-күйге бөлейтін салтанатты мереке болуының негізгі себебі – үш ай бойы ұстаздары мен сыныптастарын көрмеген балалардың сағынышпен қайта табысуы. Білім күні – ерекше, жарқын, көңілді және ізгі мереке. Жылдың осы күнінен бастап білім әлеміне деген күрделі, сонымен қатар қызықты жол басталады. Жаңаны үйретуден жалықпаған ұстаздар білім беру жоспары бойынша тың мәліметтерді іздеп, балғындарға ақпаратты ерекше етіп беруге тырысады.

Аталмыш мерекеге орай Амангелді ауданында орналасқан «Жұпар» бөбекжай-балабақшасының «Балапан» тобында тәрбиешілердің ұйымдастыруымен «Білім күні!» атты мерекелік іс-шара өтті. Балаларға Білім күні жайлы түсінік беру, маңыздылығын түсіндіру мақсатын көздеген шара барысында туған еліне, жеріне, балабақшасына деген сүйіспеншілікке тәрбиеледі. Басқосуда балалармен ойындар ойнап, би биледік. Қызықты өткен шара аясында балалардың көңіл-күйлері де көтерілді. Жағымды атмосфера орнап, білім күнінің негізін түсінген балғындар сеніммен жаңа оқу жылына, тәрбиешілер қауымы да серпінмен қадам басты.

Ұлмекен ХАМИТБЕКОВА,
«Жұпар» балабақшасының
тәрбиешісі,
Амангелді ауданы

 

Реклама