Асыл әжем – ақ әжем

Амангелді ауданындағы «Жұпар» бөбекжайында, Қарттар күніне орай, ардақты да асыл әжелеріміздің өнерін үлгі етуге арналған «Дәстүрімнің балқаймағы – Әже» атты ақ жаулықты әжелер сайысы ұйымдастырылды.

Әженің тәрбиесі – баланың өмірінде маңызға ие. Сол арқылы бала жақсы-жаманды ажыратып, үлкен-кішіні тани бастайды. Балабашамызда өткен тағылымға толы сайыстың шарты бойынша, қатысушылар 5 кезең бойынша сынға түсті. Алғашқы – «Сәлем сөздің анасы» атты таныстыру, екінші – «Өнерлі өрге жүзер»атты өз өнерін көрсету, үшінші – «Шебердің қолы ортақ» қолөнер бұйымдарымен таныстыру, төртінші – «Дәм-думан» атты ұлттық тағам сайысы болса, бесінші – «Сыр-сандық» атты сұрақ-жауап кезеңі.

Сайысқа әжелер белсене қатысып, өнерлерін ортаға салды. Әжелеріміз қолөнер бұйымдарын көрсетіп, өздері әзірлеген ұлттық тағамдарымен таныстырды. Қойылған сұрақтарға да тұшымды жауап беріп отырды. Нәтижесінде «Қарлығаш» тобының әжесі – Мария Тасмағанбетова – III орын, «Айгөлек» тобының әжесі – Мина Баймолда – III орын, «Ертөстік» тобының әжесі – Адемі Асанбаева – II орын, «Балапан» тобының әжесі – Жеңісгүл Нурканова – I орын, «Бүлдіршін» тобының әжесі – Айжан Мағзұмова – I орынды иеленді.

Салтанат АБДИБЕКОВА,
«Жұпар б/б тәрбиешісі,
Амангелді ауданы