Асыл дәстүрді дәріптеген кеш

Қазақ халқының мәдениетінде үлкенге құрмет көрсету, ата-әже тәрбиесін бағалау – тәрбие мен өмірлік тәжірибенің бастауы. Осы игі дәстүрді дәріптеу мақсатында қаламыздағы №13 бөбекжайда «Менің әжем – шебер» атты тағылымды іс-шара ұйымдастырылды.

Әжелердің даналығы мен шеберлігін көрсету арқылы өскелең ұрпаққа өнеге беру, ұмыт бола бастаған салт-дәстүрді жаңғырту мақсатындағы сайыс 4 кезеңнен тұрды. «Сәлем – сөздің анасы» атты бірінші бөлімде әрбір әже өзін таныстырып, өмір жолы мен отбасылық тәрбиесі жайлы қысқаша әңгімеледі. Әжелер ұлттық нақыштағы киім киіп, ізетті мінездерімен көрерменге жылы әсер қалдырды. «Сыр сандық» атты екінші кезеңде әжелерге салт-дәстүр, отбасы тәрбиесі және қазақ тұрмысына қатысты сұрақтар қойылды. «Бала – ата-ананың бауыр еті», «Жақсы сөз – жарым ырыс», «Ырыс алды – ынтымақ» мақал-мәтелдері арқылы даналықтары сыналды. Әжелер өмірлік тәжірибесіне сүйене отырып, тәрбиелік мәні зор ойларымен бөлісті.

«Немерем менің» деген келесі үшінші кезеңде әжелер сахнада немерелеріне арналған жылы сөздер мен өлең-жырларын айтты. Кейбірі немересіне жазған хаттарын оқып, көрермендердің жүрегін елжіретті. «Немере – әженің көз қуанышы, көңіл гүлі» дегендей, әрбір сөз аналық мейірім мен сүйіспеншілікті көрсетті. Сайыстың қызықты бөлігі – әжелердің қолөнер шеберлігін таныстыру болды. «Өнерлінің қолы алтын» атты соңғы кезеңде қатысушылар ұршық иіріп, қолғап, шұлық тоқып, кілемше мен дорба тігіп, ою-өрнек салып көрсетті. Әрбір бұйым – әжелердің қолының жылуы мен жүрек жылуын жеткізгендей әсер қалдырды.
Іс-шара соңында қатысушыларға Алғыс хаттар табысталды. Жеңімпаздар «Өнерлі әже», «Шебер қолдар иесі», «Дана әже», «Мейірімді жүрек» сияқты номинациялармен марапатталды. Бөбекжайдың әдіскері Арай Қуанышбайқызы: «Мұндай кештер – әжелердің мерейін өсіріп қана қоймай, өскелең ұрпаққа салт-дәстүрдің қадірін ұғындырудың тамаша жолы», – деп бөлісті. Ақ жаулықты аналардың ақ тілекке толы батасы кештің мәнін арттыра түсіп, көрермендердің жүрегін жылылыққа бөледі. Осылайша, тағылымға толы кеш халқымыздың дәстүрін ұлықтап, ұрпаққа насихаттаудың жарқын үлгісіне айналды.

Асель КОЗБАКОВА,
Жанагул МЫРЗАГАЛИЕВА,
№13 бөбекжайдың тәрбиешілері,
Қостанай қаласы