Ата-ана ұстанымының бала дамуына әсері

Мектепке дейінгі кезеңдегі тәрбие – адам қалыптасуының алғашқы баспалдағы. Бұл – балаланың әсерленгіш, еліктегіш, ойлауды, сөйлеуді меңгерумен, алғаш рет бөтен ортаға бейімделумен сипатталатын кезең.

Бала тәрбиесінің негізі отбасында қалыптасады. Демек, бүлдіршіннің келешекте қандай адам болуы – ең алдымен, жанұяда алған тәрбиеге, ондағы қалыптасқан қарым-қатынасқа байланысты. Сондықтан, бала тәрбиесінің нәзік тұстарын білу ата-ана үшін қажетті шарт.

Әр бала үшін ата-анасынан артық ешкім жоқ. Әсіресе, сәби шақта ата-ананың бала алдындағы беделі ерекше. Себебі, балалық шақта ата-анамен қарым-қатынаста психологиялық қорғаныс жасауға баланың мүмкіндігі жоқ. Ол естігенін, көргенін бұлжытпай қабылдап, бойға сіңіреді.

Ал енді күнделікті өмірде балаларымызбен қарым-қатынаста қолданатын сөздерімізді еске түсіріп көрейік: қалай мадақтаймыз, қалай еркелетіп, қалай ескерту жасаймыз, ренжіткенде, айтқанымызды орындата алмағанда не айтамыз? Ойланып қарасақ, біздің өміріміздегі жақсылық, кемшіліктерімізге ішкі бағыт-бағдар көп жағдайда ата-анамыздан беріледі. Сондықтан, құрметті ата-аналар, бала тәрбиелеудегі өзіміздің сөз саптауымыз бен үлгі-өнегенің балаға қаншалықты әсер беретінін әрқашан есте ұстағанымыз жөн.

Баланың әр қадамына бақылау жасап, мінез-құлық, қылықтарына үнемі баға беру оның өмірін түнекке айналдырумен бірдей. Балаңыздың әр қылығына түсіністікпен қарап, өзін бағалауға, қателіктерінен қорытынды шығаруға үйреткен жөн.

Өркениетке ұмтылған елдің болашағы – тәрбиешілер мен ата-анаға сөз өнерін жеткілікті меңгеруді жүктейді. 

Роза БОХАЙ,
«Гулдер» бөбекжай-бақшасы 
тәрбиешісі,
Затобол кенті