Бақытты балалық шақ!

Балалар – біздің болашағымыз, бастаған ізгі істеріміздің жалғастырушысы, үкілеп ұшырған үміт-құсымыздың қанаты. Олардың бақытты болуы үшін, оларға бақытты балалық шақ сыйлау үшін ата-анасы барын салуға тырысады.

Маусымның бірі – бұл жаздың алғашқы күні ғана емес, сонымен қатар Халықаралық балаларды қорғау күні. Бұл мерекеде балаларымызға деген қамқорлығымыз арта түсетіні белгілі. Біздің балабақша да мерекеден тыс қалған жоқ. Қостанай қаласындағы №13 бөбекжайда «Бақытты балалық шақ!» атты балабақша ауласында қызықты іс-шаралар ұйымдастырылып, мерекені атап өттік. Бұл күні ауа райы жылы болып, күн сәулесін шашып тұрды.

Балаларымыздың көңіл-күйлері де тамаша, жарқын әрі жайдары болды. Балаларды мерекемен құттықтауға келген көңілді сайқымазақтар, ертегі кейіпкерлері ерекше атмосфера жасады. Олар бүлдіршіндерді түрлі сайыстармен, ойындармен қызықтырды, ал балалар бірлесіп би мен әндерді қуана орындады. Әрбір баланың махаббатқа оранып, қауіпсіздікті сезініп, бақытты балалық шақта өмір сүруге құқығы бар. Жаз енді басталды. Алда көптеген қызықты іс-шаралар күтіп тұр.

Әсел ҚОЗБАҚОВА,
Ұлжан АБИЛЬТАЕВА,
№13 б/б тәрбиешілері,
Айгүл АМИРХАНОВА,
музыка жетекшісі,
Қостанай қаласы