Кішкентай жүректің мейірімі

Бала – біздің өміріміздің жалғасы болса керек. Ұрпақ жаңғырту, артыңнан ізіңді қалдыру – адамзаттың жойылып кетпеуінің бірден-бір себебі. Сол себепті бүгінгі өскелең ұрпақ – ертеңгі болашағымыз деп сеніммен айта аламыз. 

«Өскелең ұрпақтың үйлесімді дамуы мен бақытты балалық – бұл біздің жалпыұлттық міндетіміз», – деп пікірін білдірген Мемлекет басшысы Қасым-Жомарт Тоқаев 2022 жылды «Балалар жылы» деп жариялағаны баршамызға мәлім. Осыған орай Қостанай қаласында ерекше күтімді қажет ететін балаларға арналған қайырымдылық кеші ұйымдастырылған болатын. Аталған шараның ерекшелігі – осы кешке әр балабақшаға қолдан 15 ойыншық жасау тапсырылды.

Алдымыздағы әрбір бала – қайталанбас бір әлем десек, сол әлемге терең үңіліп, оның басқаға ұқсамайтын ерекше қасиеттерін тану, жүрегіне, жан дүниесіне жол таба білу, мейірімділік сияқты адами асыл қасиеттерді қалыптастыру – осынау игі шараның басты мақсаты еді. Өзім қызмет ететін №6 бөбекжай бақшасы да айтулы іс-шараға белсене ат салысып, ортаңғы «Көбелек» тобының тәрбиеленушісі Хан Қожахмет өз қолымен жасаған ойыншығын ұсынды.

«Сен де бір кірпіш дүниеге, кетігін тап та, бар, қалан», – деп дана Абай жырлағандай, кішкентай жүрегімен қайырымдылық жасаудан қалыс қалмаған бүлдіршін Ханға сөзсіз сүйсінерсің. «Әке – асқар тау, ана – бауырындағы бұлақ, бала – жағасындағы құрақ» демекші, баланың отбасын, елін сүйіп өсуіне және жақсы азамат болып қалыптасуына қоғам болып осылайша ықпал етсек – бұл болашағымызға жасалған ізгі іс болмақ.

Әсел МЕРГЕНБАЕВА,
№6 б/б тәрбиешісі,
Қостанай қаласы