Қоғамдағы татулықтың тірегі

«Тілдер туралы» Заң 1989 жылдың 22 қыркүйегінде қабылданған болатын. 1998 жылдан бастап бұл күн мереке ретінде тойланып келді. Уақыт өте атаулы датаның күні өзгертіліп, 2017 жылдың күзінде Үкімет қаулысымен «Тілдер күні» 5 қыркүйекке ауыстырылды.

Осы мереке қарсаңында Қостанай қаласындағы №16 бөбекжайында ересек және мектепалды даярлық топтары арасында қазақ тілі мұғалімі мен музыка жетекшісінің ұйымдастыруымен «Тіл – татулық тірегі» атты мерекелік іс-шара өтті. Жас ұрпақты ана тілінің қасиетін сезініп, мәртебесін көтеруге баулу және танымдық қабілеттерін дамытуды көздеген мерекелік іс-шарада балаларды тілді құрметтеуге тәрбиелеу де негізгі міндеттердің бірі болды.
Іс-шара барысында тәрбиеленушілер мерекеге арналған өлеңдер оқып, әндер орындап, ұлттық ойындарға қатысты. Іс-шара балаларға көңілді сәттер сыйлап қана қоймай, олардың сана-сезімінде тілдің ұлттар бірлігін сақтаудағы және адамдардың арасындағы татулықты нығайтудағы рөлін түсінуге мүмкіндік берді. Мереке соңында балалар тәтті шашумен қуанышқа бөленді.

Раушан ИМАНКУЛОВА,
қазақ тілі мұғалімі,
Анна ГОРБУШИНА,
музыка жетекшісі, №16 бөбекжай,
Қостанай қаласы