Құтты болсын аналардың мерекесі!

Қостанай қаласындағы №61 бөбекжай-бақшаның ересек топтар арасында 8 Наурыз – Халықаралық әйелдер күніне орай «Ай дидарлы анашым» тақырыбында мерекелік іс-шара ұйымдастырылды.

Қар астынан қылтиып бәйшешек бой көтергенде көктемнің алғашқы хабаршысындай болып, Аналар мерекесі келеді. Мерекеге орай әсем безендірілген сахнаға көңілді музыка ырғағымен балалар залға билеп кіріп, «Апамызды сыйлайық» әнін орындады. Артынша көктем мезгілінің қызығы туралы балалар деректер келтіріп, Көктем аруын ортаға шақырып, бірлесе «Көктем» әні шырқалды. Мерекелік іс-шара барысында топ тәрбиеленушілері ортаға шығып, аналары мен ардақты әжелеріне өлең жолдарын арнады. Гүлдей жайнаған қыздарымыз ортаға шығып, «Гүлдер» биімен мерекенің сәнін келтірді.

Балалардың өнерін тамашалаған Көктем аруы сөз алып: «Жарайсыңдар балалар, сондай жақсы әсердемін. Манадан бері бар өнерлеріңді ортаға салып, аналарыңды құттықтап жатырсыңдар, мен де өз атымнан аналарыңды осы көктем мерекесімен құттықтаймын», – деп, балалармен қоштасып, артынша мерекеге Кәмпит қыз келіп, қызықты сұрақтарын қойып, дұрыс жауап бергендерге тәтті кәмпит сыйлады. Іс-шара барысында «Күлгін шеңбер», «Сұлу ана» сынды ойындар да ойнатылып, мерекенің шырайын келтірді. Аналарға арналған мереке «Айнайлайын ақ мамам» әнімен керемет нотада өз мәресіне жетті.

«Мерекемен құттықтайды аналар, апайлар мен балалар,
Балабақшадан тәрбиеленіп шығады,
Бүгінгі бүлдіршін – ертеңгі даналар.

Аналардың кең ғой әркез жүрегі,
Бүлдіршіндерді еркелетіп жүреді,
Жақсы азамат болу үшін ұрпағы,
Балаларына көңілін көп бөледі.

«Жидек» тобының кішкентай қыздарын,
Құттықтады құрбы-құрдас ұлдары,
Әркезде де бақытты болыңыздар,
Шаңырақтың жауқазындай гүлдері.

Балабақшаның апайлары қымбатты,
Аяулы да кішіпейіл, сымбатты
Жақсы тәрбие бергендеріңіз үшін,
Тілейміз біз сіздерге бар бақытты».

Алмагул ЖУМАБАЕВА,
Жанар ИБРАЕВА,
№61 бөбекжай-балабақшаның тәрбиешілері,
Қостанай қаласы