Табиғаттың жас жанашырлары

Мектеп жасына дейінгі балалардың экологиялық тәрбиесіне көңіл бөлу – жұмысымның маңызды бағыттарының бірі. Сол себепті, тәрбиеленушілерге экологиялық тәрбие беру арқылы табиғатқа деген сүйіспеншілігін ояту назардан тыс қалған емес.

«Алтын бесік» бөбекжайының ересек «Қарлығаш» тобының тәрбиешісімін. Осы жастағы балалардың әрекеті қарапайым еңбек түрлерін орындауға бағытталады. Өзінің жас шамасына сәйкес, тапсырмаларды ынталылықпен орындау нәтижесінде қоғамдық еңбек мотиві ерекше сипатқа ие болады. Бұл топтағы балаларда ортаны танудың физиологиялық механизмдері өзінің жоғары даму деңгейіне жетеді. Іштей ойлау, ой түю пайда болады. Ол енді табиғаттың өзіне тән кейбір құбылыстары мен қасиеттері жайында білетін болады. Ойын мен еңбек әрекеті ұштаса жүреді. Табиғаттағы пайдалы жұмыс түрін орындауда ынталанушылық көрініс табады.

Тәрбиеші ұсынған әр түрлі тапсырмаларды өздігінен орындау дағдыларының дамуы баланың оқу ісіне, білім алуға бейімделуіне ықпал етеді. Мысалы, адамның еңбегімен көшені, жолды тазарту, қарды күреу балалардың өз аулаларының қарын тазалауға жәрдемдесулеріне әкеледі. Сондықтан, жас ұрпақты тәрбиелеуде ата-ана мен педагогтердің бірлесе жұмыс істеуі маңызды. Біздің топтың ата-аналары балалар мен педагогтерге қолдау білдіру мақсатында, бірлесе отырып тобымыздың даладағы ойын алаңын қардан тазалауға көмек көрсетті. Осы сәтте, «бала естігенін емес, көргенін істейді» деген сөз есіме түсіп отыр. Расымен де, балаларға ата-аналарымен бірлесіп еңбек ету өте қызық болды, көздеріндегі қуанышты сөзбен айтып жеткізу мүмкін емес.

Гульназия АМАНТАЕВА,
«Алтын бесік» бөбекжайының
тәрбиешісі,
Заречный ауылы