Тағылымға толы апталық

Қостанай қаласындағы №15 жалпы білім беретін орта мектебінде мектепалды даярлық сыныбында Ыбырай Алтынсаринге арналған апталық өтті. Биылғы «Оқуға құштар мектеп» жобасының аясында балалар Ыбырай атамыздың бірнеше әңгімелерімен танысты.

Апталық аясында тәрбиеленуші балғындарымызды Ыбырай Алтынсариннің өмір жолымен, ағартушылыққа қосқан үлесімен, шығармашылығымен таныстырып өттік. Барлық іс-шаралар бекітілген жоспарға сайт ұйымдастырылды. Мәселен, апталықтың алғашқы күні балалар атамыздың қысқаша өмірбаянымен танысты. Тәрбиешілердің айтқан әңгімесінен олар Ыбырай Алтынсарин Қостанай өңірінің тумасы, яғни біздің жерлесіміз екенін және бірінші болып қазақ жастарын оқу мен білімге шақырғандығын есінде сақтады.

Балалар Ыбырай атамыздың «Бір уыс мақта» әңгімесін сахналап, адам бойынан табылуы тиіс адамгершілік қасиеттерді ұғынып, дүниедегі жанды тіршілік иесі немесе жансыз заттар болсын, ешқайсысын да керексіз қылып, жерде қалдыруға болмайтындығы жайлы түсінді. Апталықтың үшінші күні балалар «Әке мен бала» бейнематериалын тамашалап, оған қатысты ой-пікірлерін білдірді. Соңғы күні «Кел, балалар, оқылық» тақпағын мәнерлеп оқып, білім алуға, сол жолда ерінбей еңбек етуге келісті. Балғындар апталық барысында Ыбырай Алтынсарин жайлы көптеген мәліметтерге қанық болып, болашақта басқа да ертегілерін оқуға уәде берді.

Ақмарал АХМЕТЖАНОВА,
№15 ЖББМ тәрбиешісі,
Қостанай қаласы