Таңғажайып табиғат әлемі

«Қаламқас» балабақшасындағы «Жұлдыз» тобының тәрбиеленушілерімен «Бізді қоршаған әлем» тақырыбында ашық сабақ өтті. Сол арқылы айналамыздағы тіршілік көздерін қорғау керектігін ұғындыру көзделді.

Табиғат аясында өзін мәдениетті ұстауға, қоршаған ортаны ластамай таза сақтауға тәрбиелеу мақсатындағы шара барысында қоршаған ортадағы заттардың қолданысы, құрылысы, материалы арасындағы байланыс туралы білімдерін қалыптастыру, табиғат аясындағы еңбекке үйрету назарда болды. Сабақ барысында балалар табиғат макетімен, ондағы жер, су, ауа, тау, тас, күн, аң, құс, жануарлар, өсімдіктермен танысты. Сондай-ақ, тәжірибелік жұмыс ретінде шарды ауамен үрлеу, мұрындарын жабу арқылы ауамен тыныстауды және судың дәмін татып, оның иіссіз, түссіз болатындығын, күннің сәулесіне (шам) алақандарын тосып жылу, жарық беретіндігін сезінді, түсінді, көрді.



Тосын сәт те орын алды. Суретшіге қонаққа бару арқылы құм терапиясы, яғни құммен суреттер салып, барлығы қызығушылықпен орындады, қиялындағы суреттерін жарыса салды. Дидактикалық ойын steam технологиясы бойынша құрғақ майлыққа салынған суреттер бейнесін бастырып бояп, одан шыққан қорытындыны су бетінен тамашалап, мәз болды. Одан бөлек табиғат аясындағы еңбекке баулу, шашылған қоқыстарды жинап, рет-ретімен әйнек, пластик, қағаз тәрізді жәшіктерге бөліп, сұрыптап салуды үйренді, яғни қоқыстардың қайта өңделіп шығатындығы түсіндірілді. Сабаққа балалар үлкен қызығушылықпен қатысты.
 

Ғалия ДІЛМАҒАМБЕТОВА,
«Қаламқас» б/б тәрбиешісі,
Амангелді ауданы