Тарихты ұғындыру – парыз

«Жұпар» бөбекжай-бақшасында тәрбиеленіп жатқан балаларға еліміздің қысқаша тарихымен, мемлекеттік рәміздермен таныстыру мақсатында «Тәуелсіз Қазақстан» атты мерекелік іс-шара өткізілді.

Шежіресі сонау ежелгі түркіден бастау алатын қазақ халқы бағзы заманнан бері өзінің қабырғалы қалпын, салиқалы салтын сақтап қалғаны – еркіндік сүйгіштік жігерінің, асқақ рухының нәтижесі. Түпкі негізі сонау сақтардан басталып, ғұн, қаңлы, қыпшақ, Ақ Орда мен Қазақ хандығының жалғасы – бүгінгі тәуелсіз Қазақстан мемлекеті. Балғындарды тарихпен таныстыра отырып, іс-шараның негізгі бөліміне көштік.

Жалпы шара жылдар бойы бабаларымыздың арман еткен егемендігіне қол жеткізгендігімізді, осы еңселі тәуелсіздікке жету жолын өскелең ұрпаққа ұғындыру мақсатын көздеді. Жиында балалар тәуелсіздік туралы ән-жырларын айтып, «Домбыра» биін биледі. Тарихтан белгілі, 1986 жылы орын алған Желтоқсан оқиғасынан көрініс те қойылып, Қайрат Рысқұлбековтың рөлін Жандәулет Бейсенбек ойнады. Тәуелсіз Қазақстанның таңы нұрлы, егемен ел ұрпағының еңсесі биік болып, көк аспанда туымыз мәңгі желбіресін!

Ұлмекен ХАМИТБЕКОВА,
«Жұпар» б/б тәрбиешісі,
Амангелді ауданы