Терезе алдындағы бау-бақша

«Балапан» балабақшасындағы ересек «Еркетай» тобында балалардың бау-бақша жайлы білімдерін арттырып, көгөністерді егудің барысымен таныстыру мақсатында «Терезе алдындағы бау-бақшаны» күтіп-баптаудамыз.

Бау-бақша дегеніміз – өзіндік ерекше құбылыс. Оны күтіп-баптау, әркез суарып, арамшөптерін жұлу – қажырлы еңбекті қажет етеді. Жастайынан балаларды еңбекке баулып, айналасындағы тірі табиғатқа қамқорлықпен қарауға деген сезімдерін арттыру мақсатында балабақшамызда терезе алдында шағын бау-бақшамызды қалыптастырдық.

Балаларымен бау-бақшаны отырғызу барысында өсімдіктер мен көгөністердің жетілу барысын бақылап, оларға күтім жасадық. Аталған іс-шара арқылы балалардың эстетикалық сезімдерін арттырып, еңбек іс-әрекетіне баулу көзделді. Бау-бақшаны отырғызу барысында балалардың жұмысқа деген икемділіктері мен ептіліктерін байқадым. Олардың әрбір жасаған жұмысын тиянақты орындағаны көңіл қуантпай қоймады.

Бау-бақшаға уақытылы күтім жасау үшін әр күнге кезекші бала қойып, жұмысты сүйіспеншілікпен жасауға тәрбиелеу назардан тыс қалмады. Балалардың әрқайсысы өз кезекшілігін асқан ынтызарлықпен күткенін ерекше атап өтсек ләзім.

Балалар терезе алдындағы бау-бақшамыздың әрбір өсіп шыққан көгөніс пен өсімдіктеріне риза болып, қуаныштан жүздеріне күлкі ұялап, жасаған еңбегінің жемісін көріп жүр. Бұл жұмыстар арқылы балаларды еңбекке тәрбиелеп қана қоймай, бау-бақшаның пайдасы жайлы оларды ақпараттандырдық. Балалардың қуанышында шек жоқ, ал терезе алдындағы бау-бақшамыз тобымызда ерекше орын алып тұр. «Терезе алдындағы бау-бақша» әрбір балабақшада орын алғанын қалаймын.

Арузат ҚАБИ,
«Балапан» б/б тәрбиешісі,
Әулиекөл ауданы,
Құсмұрын ауылы