Тілді оқытудағы таптырмас көмекші

Мектеп жасына дейінгі балаларды оқыту – бұл мектеп оқушылары мен ересектерді оқытуға қарағанда мүлдем басқа әдістемелік тәсілді қажет ететін өте қиын мәселе. Балалармен жеке жұмыс жүргізудің маңызы зор.

Жеке жұмыс аясында мен тақырыптық карталарды («Жиһаз», «Жануарлар», «Гүлдер», «Көлік», «Құстар») қолдана отырып, олардың сөздік қорын кеңейтемін. Осындай карточкаларды біздің тәрбиеленушілеріміздің ата-аналарына бос уақыты болған кезде пайдалануға кеңес беремін. Балалармен серуендегенде немесе сабақтан тыс уақытта өткізетін уақыт маған тәрбиеленушілердің дыбыстық сөйлеуін жақсартуға мүмкіндік береді.
Көп жаттығуды қажет ететін процесс – дұрыс дыбыстау. Аталған әдісті өзім қолданамын және ата-аналарға балаларға қазақ тілінде әндер мен тақпақтары бар оқу дискілерін қосуға кеңес беремін. Сондай-ақ жеке жұмыс барысында көрнекі құралдарды, мимика, ым-ишара, дене қимылдарын қолданамын. Тілді үйренуде схемалар немесе мнемотаблицалар үлкен көмек көрсетеді. Ең бастысы, балаларды қызықтыра білу. Сонда оң нәтижесі де болмақ.
Балалардың жеке жұмысқа қуанышпен қарайтын себебі – көңілді білім беру ойындары. Біздің балалардың ең сүйікті ойындары – «Білесің бе, сен?», «Қалаға саяхат», «Үш затты ата», «Басқа сөзбен ата», «Не артық?» және т.б. Ойын арқылы тілді үйрену балалардың қазақ тілін үйренуге деген ынтасын жоймауға мүмкіндік береді. Баланың жеке ерекшеліктерін ескере отырып, таңдалған қызықты оқу материалы, сізге жеке режимде барынша көп уақыт өткізуге мүмкіндік береді.

Гүлдана УРКУМБАЕВА,
«Улыбка» б/б
қазақ тілі мұғалімі,
Лисаков қаласы