Ұстаздар арасындағы жарыс

Дүниежүзілік мұғалімдер күнімен үйлестіру мақсатында, биыл Қазақстанда ұстаздар мерекесі қазанның 5-і болып бекітілді. Мерекеге орай, №61 бөбекжай ұжымының қызметкерлерімен тәрбиешілері арасында, дойбыдан жарыс ұйымдастырылды.

Алғаш болып құттықтау сөз балабақша меңгерушісі Гүлжан Искаковаға беріліп, ол жарысқа қатысушыларға сәттілік тілеп, ұстаздарды мерекесімен құттықтады. Бір қарағанда, тым жеңіл көрінгенімен, дойбы ойынында да табан астында тапқырлық таныта білуіңіз керек. Бір бұрыс жүріс – бүкіл ойынының тағдырын шеше салады. Әр қадамын аңдап басып, өзара тартысқан ойыншылар жарыстың көрігін қыздырды. Нәзік жандыларымыз жеңіс жолында аянып қалмады.

Жарыста Жанагуль Нурмуханованың алдына ешкім түсе алмай, жеңіс тұғырының бірінші сатысынан көрінсе, екінші тұғырға Алтыншаш Серікбай тұрақтады. Ал, қола жүлдені Назым Алпысбаева місе тұтты. «Жеңіске деген жігері үшін» аталымымен Венера Бектабанова және «Белсене қатысқаны үшін» аталымымен Ырыс Тұңғышбаева марапатталды. Жеңімпаздар мен жүлдегерлерге естелік сыйлықтар мен медальдар табысталды.

Сәділ БАЙДАУЛЕТОВ,
№61 балабақшаның
дене шынықтыру
нұсқаушысы,
Қостанай қаласы