Заречныйда әдемі балабақша ашылды

Тәуелсіздік күні қарсаңында Қостанай ауданына қарасты Заречный ауылында мемлекеттік тіл – қазақ тілінде білім мен тәрбие беретін 90 орынға қарастырылған «Әдемі» бөбекжай-балабақшасы ашылды.

Жеке кәсіпкер Руслан Жомартұлы Жылқыбаевтың жеке инвестициясы есебінен ашылып отырған балабақшаның құрылыс жұмыстары бір жыл бойы жүргізілген. Ықшамды. Бөлмелері жинақы. Іші қажетті жиһаздармен, балғындардың дамуына керекті құралдармен, ойыншықтармен қамтылған. Бастысы педагогикалық құрам мықты екендігін айтады директоры Әсел Шаймерденова. Балабақша тәрбиешілер, аспаз және техникалық қызметкерлерді қосқанда жалпы саны 19 адамды жұмыс орнымен қамтып отыр.



Бөбекжайдың ашылу салтанатында Қостанай облысы білім басқармасының басшысы Зәуре Байменова хабарлағандай, «Әдемі» балабақшасына балаларды орналастыру электронды кезек арқылы өтеді. Тәуелсіздік күні мерекесі өткен соң, бөбекжайға балғындардың үш тобын жинау көзделген. Қазіргі санитарлық талаптар бойынша балабақшада 15 балаға дейінгі кезекші топтар ғана жұмыс істемек. Ал мемлекет тарапынан балабақшаға мектепке дейінгі тәрбие мен оқытуға мемлекеттік білім беру тапсырысын орналастыру түріндегі қолдау көрсетілетін болады.



P.S: Қостанай ауданында балаларға мектепке дейінгі білім беру бағытында 7 балабақша жұмыс істейді. Оның 5-еуі мемлекеттік, ал 2 жекеменшік балабақшаның бірі – жақында ашылған «BK KINDER», екіншісі – мақалада сөз етіп отырған «Әдемі» балабақшасы. Аудан бойынша мектепке дейінгі бұл ұйымдардың барлығында 900-ден астам балғын білім мен тәрбие алуда. Одан бөлек мыңнан астам бала қамтылған мектепке дейінгі 44 шағын орталық бар.
 

Жамал ШАУКЕН,
суретті түсірген Сергей МИРОНОВ