Балабақшамыздың үздік оқырманы

Қостанай қаласындағы «Айгерим-Ай» балабақшасының тәрбиеленушісі ҚР Тәуелсіздігінің 30 жылдығына орай қолға алынған бақшааралық «Жас оқырмандар» атты мәнерлеп оқу сайысында бақ сынап, жүлдеге ие болды.

Ең әуелі, өзіміздің балабақшамыздың жеңімпазын анықтау мақсатында мәнерлеп оқу сайысын ұйымдастырдым. Сайыс балабақшамыздың балғындарын патриоттыққа тәрбиелеу, қазақстандық жазушылардың шығармаларынан үзіндіні мәнерлеп оқуға үйрету, мектепке дейінгі балалардың дауыс ырғағын, сөз екпінін дамыта отырып, жұртшылық алдында өзін еркін сезінуге баулуды көздеді.

Сайысқа балабақшаның барлық жас топтары, барлығы 8 топ қатысты. Олар: «Гүлдер», «Балбөбек», «Жұлдыз» мектепалды даярлық топтары, «Шаңырақ», «Ақбота» ересек топтары, «Солнышко», «Колобок», «Айналайын» ортаңғы топтары және «Балапан» кіші тобы. Әр жас топтарына І, ІІ, ІІІ орындар берілді. Қатысушылар өлеңдерін жатқа айту арқылы Отанына деген сүйіспеншіліктерін дәлелдеді.

Әділ қазылар алқасының шешімімен оқырмандардың ішінде ең үздігі деп танылып, қалалық сайысқа жолдамаға «Жұлдыз» тобының тәрбиеленушісі Тимофей Тарасенко ие болды. Ол Мұқағали Мақатаевтың «Үш бақытым» өлеңін қазақ, орыс және ағылшын тілдерінде оқып берді. Артынша балабақшамыздың жеңімпазы Қостанай қаласы Білім беру бөлімінің ұйымдастыруымен өткен сайыста бақ сынап, 32 қатысушының арасында жүлделі 2-орынға ие болды.

Тимофей Тарасенко балабақшамыздың өте белсенді тәрбиеленушілерінің бірі. Ол бұған дейін де қалалық білім бөлімі Ы.Алтынсариннің 180 жылдығына орай ұйымдастырған мәнерлеп оқу сайысына қатысып, «Патриот» номинациясын жеңіп алған еді. Балабақшаның барлық іс-шараларына белсене қатысады. Осындай жетістіктерге жетіп, балабақша атын шығарған кішкентай бүлдіршінімізді мақтан етеміз.

Аиэлита БАЙЗАКОВА,
«Айгерим-Ай» б/б
қазақ тілі мұғалімі,
Қостанай қаласы