Қыз – өмірдің қызғалдағы

Халқымызда қыз бала тәрбиесіндегі қалыптасқан дәстүрді насихаттау басты назарда. Осы мақсатта Арқалық қаласындағы «Ақбота» балабақшасында бүлдіршіндер арасында Гүлмира Нуркенованың ұйымдастыруымен «Қыз сыны-2022» байқауы өтті.

Аталмыш байқауға қатысуға әр топтан ниет білдірген 9 бүлдіршін іріктелініп алынды. Атап айтсақ, олар: Ару Диасқызы, Іңкәр Асқар, Данэлия Кульмухамедова, Жансезім Берік, Аянат Еркенқызы, Айлин Алматова, Айзере Даулет, Раяна Мылқайдар және Інжу Бияхмет. Ал олардың өнеріне әділ төрелігін жүргізген қаламыздың жасөспірімдер театрынан Г.Балгенбаева, облыстық әмбебап кітапхана қызметкері Е.Байденова, орыс тілі мұғалімі С.Хасенова қазылар алқасының құрамында болды.

Өскелең ұрпақтың санасындағы салт-дәстүрге деген құрмет сезімін арттыру бағтындағы байқау аясында бүлдіршіндеріміз өнерге, ас мәзіріне, сән үлгісіне ерекше дайындықпен келгенін көрсете білді. Қыздарымыз байқаудың әрбір кезеңінде өздерін еркін ұстап, сахнаға бейімділіктерін көрсете білді. Бұл орайда тәрбиеші мен ата-ана арасындағы байланыс жақсы жолға қойылғанын да атап өтуге болады.

Бар өнерлерін ортаға салған кішкентай қыздарымыз бақ сынаған байқау нәтижесінде «Ақбота-2022 аруы» атағына Раяна Мылқайдар ие болды. Ал бірінші тұғырға Айзере Даулет пен Інжу Бияхмет тұрақтаса, екінші орынды Жансезім Берік иеленді. Жүлделі үшінші орынды Іңкәр Асқар жеңіп алды. Одан бөлек «Көрікті көктем аруы» номинациясымен Ару Диасқызы, «Өнерлі ару» номинациясымен Айлин Алматова, «Сәнқой ару» номинациясымен Аянат Еркенқызы, «Инабатты ару» номинациясымен Данэлия Кульмухамедова марапатталды.

Өміріміздің бар қызығы болған балаға дұрыс тәрбие бере алсақ, оның келешегіне де зор үмітпен қарауға болады. Ал осындай балабақшаішілік іс-шаралар жас ұрпақтың жан-жақты болып өсуіне үлкен ықпалын тигізеді. Байқаудың нәтижесінде кішкентай аруларымызға дипломдар мен естелік сыйлықтар табысталды. Сонымен қатар байқаудың әрбір кезеңдеріне сай бүлдіршін қыздарымыздың киімдері мен бейнероликтерін дайындап, қолдау көрсеткен ата-аналарына алғыс білдіреміз.

Сәуле ХАСЕНОВА,
«Ақбота» балабақшасы
орыс тілі мұғалімі,
Гүлмира НУРКЕНОВА,
педагог-психолог,
Арқалық қаласы