«Абай үні, Абай лебі» байқауы

Бейімбет Майлин ауданының тілдерді оқыту орталығының ұйымдастыруымен «Абай үні, Абай лебі» атты оқушылар арасында мәнерлеп оқу байқауы өтті. Байқауға аудан көлеміндегі білім ордаларының оқушылары қатысты.

Іс-шара Абай шығармашылығын насихаттау арқылы жастардың қазақ тілі мен әдебиетіне, мәдениетіне деген ықласын арттыру және еліміздің рухани бірлігін нығайту, сол арқылы патриоттық сезімін оятуға үлес қосуды көздеді. Әділ қазылар алқасы байқау қатысушыларының жұмысын бағалау барысында олардың көркем шығармаларды оқу шеберлігіне, қазақ тілінің орфоэпиялық нормаларының сақталуына, ән орындау шеберлігіне, сахна мәдениетіне, сонымен қатар қатысушының киген киімі таңдалған тақырыпқа сәйкес болуына қарап, соның негізінде 5 баллдық жүйе бойынша бағалады.
Тағылымды байқауға қатысушыларға әділ бағасын беретін қазылар алқасы сайланды. Олар: тілерді оқыту орталығының оқытушысы Маржан Нұрсейтова, мәдениет және тілдерді дамыту бөлімінің бас маманы Гулнур Бобжикова және тілдерді оқыту орталығының оқытушысы Жумабек Калмагамбетов. Тоқсан ауыз сөздің тобықтай түйінін шығарған қазы алқасының төрайымы Маржан Жұмағазықызы «Абай үні, Абай лебі» атты оқушылары арасындағы мәнерлеп оқу байқауына қатысушыларға ізгі тілегі мен ықыласын, Абай шығармашылығы – асыл сөздің мәйегі екенін тілге тиек етті.
Осылайша, шығармашылық салтанат құрған байқау нәтижесінде жүлделі I орынға 11-сынып оқушысы Әдемі Айтмағанбетова, II орынға 7-сынып оқушысы Әдемі Орақбай, ал III орынға 6-сынып оқушысы Айару Берік ие болды. Қалған қатысушыларға ынталандыру сыйлықтары мен мадақтамалар табыс етілді.

Б.Майлин ауданының
Тілдерді оқыту орталығы