Ақын мұрасы – ұрпаққа аманат

Абай атындағы жалпы білім беретін мектепте ақын А.Құнанбайұлының 180 жылдығына орай қалалық ғылыми конференция өтті. Бұл іс-шара өскелең ұрпақтың рухани дамуына, Абай мұрасын тереңірек түсініп, ғылыми ізденістерін жетілдіруіне ықпал етті.

Аталмыш конференция барысында қала мектептерінің дарынды оқушылары өздерінің зерттеу жобаларын ұсынып, баяндамалар жасады. Олар ақынның шығармашылығын әр қырынан талдап, қанатты сөздеріндегі адамгершілік тәрбиесі, жастарға рухани бағыт-бағдар беру, Абай Құнанбайұлы философиясының қазіргі қоғамдағы маңызы сияқты тақырыптарға тоқталды.
Біздің Абай атындағы мектептің оқушылары да байқауда білімдері мен ізденімпаздықтарын танытып, жүлделі орындарды иеленді. Мысалы, «Абай афоризмдеріндегі адамгершілік тәрбиесі» тақырыбындағы зерттеуімен Диас Зейнетов (жетекшісі – Бисеналиева Гульзада Шаймардановна) II орынға, ал «Абай мұрасы – жастарға рухани тәрбие берудің негізі» баяндамасымен Назым Өтемұратова (жетекшісі: Шегенова Бахыткул Амантаевна) III орынға ие болды.
Конференция қатысушыларына арнайы дипломдар мен сертификаттар табысталып, олардың еңбектері жоғары бағаланды. Сонымен қатар, әділ қазылар алқасының мүшелеріне Алғыс хаттар табысталды. Аталған іс-шара ғылыми ізденістер алаңы ғана емес, жас ұрпақтың ұлы ойшылдың мұрасын зерттеп, оны өмірлік ұстанымдарына айналдыруына мүмкіндік берген маңызды бастама болды. Конференция жоғары деңгейде ұйымдастырылып, өз мақсатына толық жетті деуге болады.
Тағылымға толы іс-шараны ұйымдастыруға атсалысқан барлық ұстаздар мен қатысушыларға, қазылар алқасына мектеп әкімшілігі атынан алғыс білдіреміз. Абай Құнанбайұлының мұрасы – мәңгілік, ал оны дәріптеу – біздің ортақ міндетіміз.

Бахыткул ШЕГЕНОВА,
Абай атындағы жалпы
білім беретін мектептің
қазақ тілі мен әдебиеті
пәнінің мұғалімі,
Рудный қаласы