Дәстүрлі байқау: «Шәкәрім оқулары»

Ы.Алтынсарин атындағы облыстық балалар мен жасөспірімдер кітапханасында мектеп оқушылары арасында дәстүрге айналған IIІ Республикалық «Шәкәрім оқулары» байқауының облыстық іріктеу кезеңі өтті.

Шәкәрім Құдайбердіұлының шығармашылығын балалар мен жасөспірімдер арасында насихаттау мақсатындағы байқауға өңіріміздің түкпір-түкпірінен дарынды әрі алғыр жастар қатысты. Олар қазақ әдебиетінің көрнекті тұлғасы Шәкәрімнің мұрасын тереңірек зерттеп, өлеңдерін жатқа айтып, оның философиялық ойларын талдауға тырысты.

Қостанай қаласындағы №11 жалпы білім беретін мектептің оқушысы Олжас Кенжебек те бағын сынау үшін арнайы келген. Ол Шәкәрім Құдайбердіұлының 11 өлеңін жатқа білетінін айтып, сайыста бар білімін ортаға салды. «Сайыс өте жақсы өтті. Мен Шәкәрім атамыздың өлеңдерімен шектеліп қоймай, болашақта Абай атамыздың да шығармаларын терең зерттеп, жатқа оқып, түрлі байқауларға қатысуға тырысамын», – дейді ол.
Байқаудың қатысушылары қазақ руханиятының алтын қазынасына терең бойлап, ақын мұрасының маңызын ұғынды. Ал, тәлімгерлер өз шәкірттеріне үлкен сенім артып, оларға шабыт беріп, білім жолында биік шыңдарға жетелеуге күш салатынын жеткізді. Осындай байқаулар жас ұрпақтың ұлттық әдебиетке деген қызығушылығын арттырып қана қоймай, таным көкжиегін кеңейтіп, шығармашылық қабілеттерін шыңдауға мүмкіндік береді.

Гулим БАТЫР,
Адилет НУРАБАЕВ