Ерлік ешқашан ұмытылмайды

Қостанай ауданына қарасты Мичурин ауылдық округінде Жеңіс күніне орай, Ұлы Отан соғысында қаза тапқан батырларды еске алуға арналған стелаға гүл шоқтары қойылып, олардың ерліктері туралы айтылды.

Ұлы Жеңіс күні – әр отбасы үшін қастерлі мереке. Өйткені, соғыс бірде-бір жанұяны айналып өтпеді. Әрбір шаңырақта соғысқа қатысып, жеңіспен оралған немесе ерлікпен қаза тапқан ата-әжелері бар. Қаншама адам тылда еңбек етті. Сол сұрапыл соғыста жеңіске жету жолында миллиондаған адамның өмірі қиылды, сондықтан адамзат сұм соғыстың құрбандарын әрдайым үлкен құрметпен еске алады.

Жеңіс күніне орай өткізілген іс-шараға ауыл тұрғындары, мектеп оқушылары мен педагогтері, Ардгерлер кеңесі қатысты. Ұлы Отан соғысында қаза тапқан майдангерлеріміздің рухына тағзым етіліп, бір минут үнсіздік жарияланды. Жиында Мичурин ауылдық округінің әкімі Балтабек Жумагалиев сөз сөйлеп, жас ұрпаққа Ұлы Отан соғысына қатысқан батырлардың ерлігін әрдайым жадымызда сақтап, ұмытпауымыз керек екенін қадап айтты.

Артынша мектеп оқушылары соғыс туралы өлеңдерін оқып, патриоттық бағыттағы әндер шырқады. Жеңіс күні – қасиетті де қастерлі мереке. Аға ұрпақтың ерлігін мәңгілікке есте сақтауға арналған ең қастерлі де мәртебелі мереке. Бұл – аға буын өкілдерінің жанқияр ерлігі мен еселі еңбегінің жемісі. Сондықтан ешқашан ұмыт болмай, батырларымыздың ерлік істері жас ұрпаққа насихаттала бермек.

Ерасыл ҚАЗЫБАЕВ,
Мичурин ЖББ мектебі
директорының тәрбие ісі
жөніндегі орынбасары,
Мичурин ауылдық клубының
мәдени ұйымдастырушысы,
Қостанай ауданы