Мейірімге толы жүрек қозғалысы

Президент Қасым-Жомарт Тоқаев 2020 жылды «Еріктілер жылы» деп жариялағны белгілі. Аталмыш игі шара С.Мәуленов атындағы гимназиясының оқушыларының арасында да жалғасын тапты.

Еліміздегі пандемия жағдайына байланысты бірінші тоқсанды қашықтан тәмәмдаған белсенді оқушылар игі іске өз еріктерімен ат салысты. Атына заты сай «Мейірімді жүрек» атты еріктілер тобымен бірге «Қазақстан балалары – күзгі интерактив» күзгі демалысы ұйымдастырылып, қайырымдылық шаралар жоспарланды. Мақсаты – қоғамдағы адами құндылықтарды дәріптей отырып, адамдарға жан жылуын сыйлау. «Жас келсе, іске» демекші, оқушылар жұдырықтай жұмылып, жеті қайырымдылық іс жасап, қысқа мерзім ішінде мұқтаж жандарға, табиғатқа мейірім шапағатын төкті.
Тарқатып айтсам, «Мейірімді жүрек» аясында құстарға арнап ұя жасаса, «Жақыныңа жанашыр бол» шеңберінде медициналық маска таратып, адамдардың денсаулығын сақтауға үлестерін қосты. Саламатты өмір салтын насихаттау аясында «Темекені таста» атты ұранмен кәмпит таратса, «Көмек қолын созыңыз» атты игі істе жақындарына жылулық сыйлады. Ал «Мейрімділік ағыны» шеңберінде «Қарттарым – қазынам» деген даналық сөзді тағы бір жаңғыртты. «Табиғатты аялайық» аясында қоқыс жинауға ат салысса, «Ағашты сақтаңыз» деген ұранды ұстанып, ағаштарға су құйды.
Халық арасында «Тәрбие – талбесіктен» деген сөз бекер айтылмаса керек-ті. Сол сияқты сөзден іске көшіп, қоғамдағы мәселені жүректерімен сезініп, балалардың табиғатқа жанашырлық жасағаны өте құптарлық іс. Олар бастаған ісін тоқтатқысы келмей, жалғастыра беруді ұйғарып, бойтұмардай ой түйгені сөзсіз. Осындай тәрбиелік мәні зор іске оқушыларды баули берейік.

Абылай АХМЕТЖАН,
С.Мәуленов атындағы
гимназияның аға тәлімгері,
Қостанай қаласы