Мектептің бейнесі балалар көзімен

Дене тәрбиесі және қосымша білім беру өңірлік орталығының ұйымдастыруымен «Көшбасшы аумағы» атты облыстық слёт өтті. Іс-шараға облыстың 16 өңірінен 66 білім алушы – мектеп парламенттерінің, балалар ұйымдарының көшбасшылары және өңірлік кезеңдердің жеңімпаздары қатысты.

Слёт аясында «Мектеп – балалар көзімен» атты әлеуметтік жобалар байқауы ұйымдастырылды. Әділ қазылар алқасының шешімімен жеңімпаздардан бөлек бірқатар қатысушы командалар арнайы номинациялармен марапатталды. «Үздік көгалдандырылған аумақ» – Қостанай ауданы №1 Заречный жалпы білім беретін мектебі (педагог Балауса Байқасынова); «Жайлы білім беру ортасы» – Ұзынкөл ауданы Арзамас жалпы білім беретін мектебі (педагог Анна Горбулина); «Дизайнға шығармашылық көзқарас» – Меңдіқара ауданы Жангелдин жалпы білім беретін мектебі (педагог Аягоз Серикбаева); «Әлеуметтік белсенділік» – Амангелді ауданы А.Нұрманов атындағы жалпы білім беретін мектебі (педагог Қуандық Шонгалов); «Болашақ мектебі» – Бейімбет Майлин ауданы Б.Майлин атындағы жалпы білім беретін мектебі (педагог Балзина Атимтаева).

Қостанай ауданының №1 Заречный ЖББМ командасы

Қатысушылар мектептерін қалай елестететінін макет арқылы көрсетті

Ал байқаудың бас жүлдесі – «Комфорт+мектебі» жобасымен Қарабалық ауданы Тоғызақ жалпы білім беретін мектебіне (педагог Наталья Волошенко) бұйырды. Жеңімпаз команда Қостанай облысы әкімдігінің білім басқармасы дипломымен және жобаны жүзеге асыру үшін 3 миллион теңге көлеміндегі қаржылай сыйлықпен марапатталды. Жетекшінің айтуынша, жобаның басты ерекшелігі – оның оқушылардың шынайы қажеттіліктеріне бағытталуы. Жоба авторлары – Тоғызақ мектебінің 7-сынып оқушысы Светлана Звонарева мен 11-сынып оқушысы Максим Шайхуллин.

Әлеуметтік жоба байқауының жеңімпаздары – Тоғызақ ЖББМ

– Жобаны бастамас бұрын оқушылар арасында сауалнама жүргіздік. Нәтижесінде баскетбол алаңы, метеостанция және коворкинг аймағы ең қажетті нысандар ретінде таңдалды. Біз осы идеяларға сүйене отырып жобамызды құрдық. Өзім кішкентайымнан баскетболға қызығамын, мектеп өміріне белсенді араласамын және болашақта педагог болғым келеді. Сондықтан бұл жобаның мен үшін маңызы зор болды. Сонымен қоса Максим екеуміз де мектеп парламентінің белсенді мүшелеріміз, – деп атап өтті Светлана.
Максимнің айтуынша, жоба бірнеше маңызды мәселені шешуге бағытталған. Соның бірі – мектептің фойесін коворкинг аймағы ретінде қайта жабдықтау. Яғни, ол демалыс пен күтуге арналған жайлы кеңістікке айналмақ. Бұл Тоғызақ мектебіне шалғай ауылдардан автобуспен қатынап оқитын оқушылар үшін тиімді шешім. Себебі, олар мектепке ерте келіп, кеш қайтады, кейде екі-үш сабақ бойы автобусты күтуге мәжбүр болады. Жоба сәтті жүзеге асса, балалар бос уақытын тиімді әрі жайлы өткізетін мүмкіндікке ие болады. Ал жастардың осы ойға алған бастамасын жүзеге асыру үшін жетекшілері мен мектеп ұжымы бар күшін салуға дайын. Балалар армандаған мектеп бейнесі енді жоба ретінде ғана емес, нақты іске асуға жақын тұр.
Жамал ШАУКЕН,
суретті түсірген автор