Өзіңді дамыту жолындағы жоба

Осыдан екі жыл бұрын «Елбасы медалі» бағдарламасы іске қосылған еді. Сол кезден бері еліміздің жастары қалауы бойынша «Алтын», «Күміс», «Қола» деңгейлерінің бірін таңдап, қарым-қабілеттерін жеті бағыт бойынша жетілдіріп келеді.

Спорт, дағды мен дарын, кітап оқу, ұлттық мұра, туристік саяхаттар және еңбек тәжірибесі бағыттары бойынша әр кезеңді өткен сайын қатысушы бойындағы қарым-қабілеттерін жетілдіріп отырады. Ал жобаның финалына шыққандар алдағы жеңістерінің бастауы болатын – «Елбасы медалімен» марапатталады.

Былтыр желтоқсан айында республика бойынша «Елбасы медалінің» иегері болатын 2259 қатысушы бекітілді, оның ішінде 3-еуі алтын медальге, 40-ы күміс медальге, ал 2216-сы қола медальге ие болмақ. Сол қола медаль иегерлері біздің №15 мектеп оқушыларының арасында да бар. Жақында «Елбасы медалі» бағдарламасына «Қола» деңгейінде қатысқан біздің 11-сыныптың 5 оқушысы мен 9-сыныптан қатысқан мен де көптен күткен марапатымызды алып қайттық.

Медальді алу жолында бас кезінде қиналғаным рас, артынша берілетін тапсырмалардың ауқымына, жұмыс жоспарына етім үйреніп кетті. Әр қадамымды жоспарлап, аңдап басып, қателіктер жібермеуге тырысып бақтым. Нәтижесінде аптаның әр күнін пайдамен өткізіп жүргенімді байқадым. Әр бағытта жан-жақты ізденіп, пайдалы дүниелерге қанық болдым, қызығушылықтарым да өзгерді. Мысалы, осы бағдарламаға қатысар алдында көп кітап оқымайтынмын. Өз түсінігімді айту, ойымды нақты жеткізу қиынға соғатын. Бірақ осы жобаның арқасында кітап оқуға деген қызығушылығым оянып, уакыттымды да тиімді әрі пайдалы өткізе бастадым. Жоба аясында жастармен жұмыс барысында түсіністікпен қарап, қолдау көрсеткен, ақыл-кеңестерін айтып, алға ұмтылуға шабыттандырған тәлімгерлерге де алғыс білдіргім келеді.

Жалпы бағдарламаға қатысу арқылы табиғатты сүюге, айналаңа аз да болсын көмек көрсету үшін тек шынайы ниетің болса жеткілікті екенін ұғындым. Жобаның арқасында болашақта алға қойған мақсаттарыма жету үшін жоспар қойып, оған қол жеткізу үшін жүйелілік қажет екенін түсіндім. Расымен де, кез келген іс нәтижесін берсін десек, уақытымызды жоспарлап, мақсатымызға жету жолында жүйелі түрде әрекет етіп отыру қажет. Осындай пайдасы мол бағдарламаның келешек және қазіргі жастардың болашағына тигізер әсері зор деп есептеймін.

Дильназ МУЖИКПАЕВА,
№15 ЖББМ
9-сынып оқушысы,
Қостанай қаласы