Шығармалар байқауы өтті

Выпуск - №36(432)   :   11.09.2020
56

Рудный қаласындағы №18 орта мектепте қыркүйектің 5-і күні атап өтілетін Қазақстан халқы тілдері күні мерекесіне орай 1-5 қыркүйек аралығында жоғарыдағыдай тақырыпта мектепішілік шығармалар байқауы ұйымдастырылды.

Тілдің көкжиегін кеңейтуге, тілді дәріптеуге арналған қашықтық форматта өткен тағылымы мол шараға орта буын сыныбының оқушылары қатысты. Шара тіл көркемдігін, байлығын, шешендігін көрсететін нақыл сөздер, мақал-мәтелдер арқылы оқушы дүниетанымын, ой-өрісін дамытуды мақсат етті. Сондай-ақ тіл тазалығын сақтау, мәдениетті сөйлеу, шешендік өнерді оқушы бойына сіңіре отырып, ана тіліне деген сүйіспеншілігін қалыптастыруды көздеді.

«Елу жылда ел жаңа» демекші, еліміз тәуелсіздікке қол жеткізгеннен бері мемлекеттік тіл мәртебесі жыл өткен сайын артып келеді. Мектебімізде қашықтан ұйымдастырылған шығарма сайысы да соның бір дәлелі іспеттес. Қуана атап өтетін жайт – байқауға орта буын оқушылары белсене ат салысып, тіл мәртебесі жайлы қалам тербеді. Шығарма жазу барысында тіл байлықтарын, сөздерді орнымен әрі мазмұнды түрде қолдана білу шеберліктерін көрсете білді.

«Жүйріктен жүйрік озар, жарысқанда» демекші, сайыс нәтижесінде 5-сынып оқушылары Жанет Ерполатаева бірінші орынды иеленсе, сол сияқты Алихан Райымбеков пен Альбина Бақтияр сынды оқушылар да жоғары деңгейден көріне білді. Иә, «Тіл – адам жанының тілмашы, тілі кем болса, адамның қор болғаны» демекші, тіл – тарих тереңіне бойлатып, өнер бұлағына сусындататын рухани әлеміміздің сарқылмас бұлағына айналса деймін.

Ермек САДВАКАСОВА,
№18 ОМ қазақ тілі мен
әдебиеті пәнінің мұғалімі,
Рудный қаласы

 

Реклама