Ұялы телефон сыйға тартты

Қиын жағдайда қолұшын созу – қанымызда бар қасиет. Қазіргі жер жаһанды жайлаған індеттің салдарынан білім беру жүйесі қашықтан оқыту форматына көшкендіктен ақпараттық технологияларға деген тәуелділігіміз арта түсті.

Білім беру орындарында қашықтан оқытуға, оның ішінде білімді бағалаудың барлық түрлерін қашықтан жүргізуге ауыстыру – əлемді жайлап келе жатқан коронавирус індетінің таралуын тежеу үшін қабылданған нақты қадамдардың бірі екені мəлім. Осы ретте қашықтан оқытудың əдістері, мәселелері, нəтижелері мен болашағы туралы бағыт-бағдарлар білім саласындағы əрбір маманды бей-жай қалдыра алмайды. Ә.Боранбаев атындағы жалпы білім беретін орта мектебінің оқу ісі меңгерушісі Гүлнар Қойшықызының ұйымдастыруымен бұл бағытта ұтқыр шаралар іске асырылуда.

Амангелді ауданының белсенді жастары, жас кәсіпкерлер Асқаров Ақансері Балғабекұлы мен Жусупов Наурызбай Елубайұлының демеушілігімен Ә.Боранбаев атындағы орта мектептің 7-сынып оқушылары Адай Ерболатұлы мен Аяжан Тілеуғазыға ұялы телефон алып берді. Демеуші жастарға оқушыларымыздың ата-аналары алғыстарын айтып, ризашылықтарын білдіріп жатты. «Жақсылық жасасаң, балаға жаса» деген сөз бар. Кішкентай бөлінген көңіл олардың санасында өмір бойы жақсы бір естелік болып қалары сөзсіз.

Торғын МАҒЗҰМОВА,
Ә.Боранбаев атындағы ЖББОМ
бастауыш сынып мұғалімі,
Амангелді ауданы