Жаратылыстану ғажайыптары

Науырзым жалпы білім беретін мектебінде мектепішілік жоспарға сай жаратылыстану-математика пәндер бірлестігінің семинары ұйымдастырылды.

Семинардың басты мақсаты – оқушылардың жаратылыстану пәндеріне деген қызығушылығын арттыру, жан-жақты білімдерін көрсетуіне жағдай жасап, топпен жұмыс істеу дағдыларын қалыптастыру, өз бетінше шешім қабылдап, ой қорытындысын жасау қабілеттерін дамыту. Сонымен қатар, оқушылардың ойлау қабілетін жетілдіріп, өз ойын нақты әрі анық жеткізуге үйрету көзделді.
Биылғы оқу жылында жаратылыстану-математика бірлестігінде 5 мұғалім қызмет атқарады. Барлығы да жоғары білімді, аудандық және облыстық деңгейдегі байқаулардың жеңімпаздары. Бірлестік құрамына математика, физика, химия, биология, география пәндері кіреді. Бірлестіктің жетекшісі – жоғары білімді педагог-сарапшы, химия және биология пәндерінің мұғалімі Перизат Айдарбаева.
Бірлестік мұғалімдері: география пәнінің мұғалімі – педагог-модератор Тумар Садакбаева, математика пәнінің мұғалімі – педагог-зерттеуші Салтанат Абжанова, сондай-ақ информатика пәнінің мұғалімі – педагог-зерттеуші Жумабек Есенбаев және физика пәнінің мұғалімі – жас маман Жандос Әли.
Семинар барысында әр мұғалім сабағын жаңаша әдіс-тәсілдермен түрлендіріп, заманауи көрнекіліктерді тиімді қолдана білді. Әсіресе, жасанды интеллект элементтері сабақта белсенді түрде пайдаланылып, оқушылардың қызығушылығын арттырды. Ұйымдастырылған сабақтарға оқушылар белсене қатысып, білімдерін шыңдау мүмкіндігін алды.

Самал НУРМАГАНБЕТОВА,
Науырзым жалпы
білім беретін мектеп
директорының оқу ісі
жөніндегі орынбасары