Абай мұрасы – мәңгілік

10 тамыз – ақын, қазақ жазба әдебиетінің, қазақ әдеби тілінің негізін қалаушы, философ, композитор, аудармашы, саяси қайраткер А.Құнанбайұлының туған күні. Сол себепті, елімізде дәл осы күн 2020 жылдан бері «Абай күні» болып бекітілген.
Биыл Абай Құнабайұлының туғанына 179 жыл толды. Осы уақытқа дейін Абай атамыздың бізге қалдырған бай мұрасы ұмытылған емес және ұмытылмайды да. Керісінше, шығармашылығы жаңа заманмен үндесіп, әр қазақ атамыздың шығармаларымен сусындауда десек, артық айтпаған болар едік. Ал, ұстаздардың, әсіресе қазақ әдебиеті пәні мұғалімдерінің бұл мерекеге деген көзқарасы, қызығушылығы өзгелерден ерек. Өйткені, білім алушыларды осындай ұлы адаммен таныстыру – біздің тікелей міндетіміз.

«Абай күнін» біз де атап өттік. Қарабалық ауданындағы М.Сералин атындағы ЖББ мектебінің ұжымы мен оқушылары бұл айтулы күнге бір кісідей атсалысты. Мектебімізде жоспарға сай іс-шаралар ұйымдастырылып, оқушылармен көптеген жұмыстар жүргізілді. Мектебіміздің Instagram парақшасында да оқырмандарды өткізілген жұмыстармен таныстырып отырдық.

Алда Абай Құнанбайұлының 180 жылдығы келе жатыр. Бұл мерейтойды тек еліміз ғана емес, жан-жақта тарыдай шашылған барлық қазақ тойлайды деген үміттемін. Халқының көкірегі ояу, көзі ашық болуына Абай атамыздың қосқан үлесі зор екенін ешкім жоққа шығармас. Ендігі кезекте, дана тұлғаларымыз жаққан шырақты сөндіріп алмай, шығармаларын ұрпақтан-ұрпаққа жалғап отыруымыз қажет.

Алмабике ЕСКЕНДИРОВА,
М.Сералин атындағы ЖББ мектебінің
қазақ тілі мен әдебиеті пәнінің мұғалімі,
Қарабалық ауданы