Бар кітапқа бас болған...

Қостанай қаласындағы Абай атындағы ЖББ мектебінде біз үшін де, 1 «А» сынып оқушылары үшін де ерекше іс-шара өтті. 42 әріпті танытып, оқуға үйреткен шәкірттеріммен «Рақмет саған, Әліппе» атты мерекелік іс-шарасы ұйымдастырылды.

Ертеңгілікте мектеп мұғалімдері, ата-аналар, оқушылар және қонақтар қатысты. Қоңыр күзде қоңырау үнімен алғашқы білім сабағына енген бірінші сынып оқушылары бүгін бір асудан асып, ең алғаш қолдарына ұстап, әріп таныған оқулықтары Әліппемен қоштасты. Аз уақыт өтсе де, бірінші сынып оқушыларының білімге, өнерге деген талпыныстары айқын байқалды. Ертеңгілікте «Әріптер» ертегісінен көрініс қойылып, оқушылардың әріптерді ажырату деңгейін анықтап қана қоймай, актёрлік шеберліктері де шыңдалғанын байқадық.

Әдемі костюм киген мың бұралған қыздарымыз бен ұлдарымыз сахна төріне шыққанда салтанатты мереке одан әрі гүлдене түсті. Ал шәкірттерімнің шырқаған әндерінен өнерден құр алақан емес екендіктерін де байқадық. Әліппемен қоштасу кешіне қонақ болып келген ата-анамыз, ақын Ақгүл ханым оқушыларға ақ жол тілеп, өзінің ыстық лебізін мынадай өлең жолдарымен жеткізді:

«Қолға ұстап ең алғаш әліппені,
Үйретіп 42 әріптерді.
Озат болсын деп сендерді әрдайым,
Ұстаздарың білімге дәріптеді.
Қоштастыңдар ал енді Әліппемен,
Түк емес сендерге енді әріп деген.
«Саналы ұрпақ болып өсіп-өніп,
Біліміңді әлемге таныт!» дер ем.
Сабақты жақсы оқыңдар, мақтайтындай,
Жақсы оқушы деп есте сақтайтындай.
Болыңдар дарынды, озат, талантты,
Сенімін ұстаздардың ақтайтындай».

Ұлмекен ЕРЕКЕШЕВА,
Абай атындағы ЖББ
мектебінің бастауыш
сынып мұғалімі,
Қостанай қаласы