Білімді ұрпақ – ел ертеңі

Айсары жалпы білім беретін мектебінде 7–10-сыныптар арасында «Білімді жастар – ел болашағы» тақырыбында пікірсайыс өтті. Алғаш рет ұйымдастырылып отырған мектепішілік пікірсайыс турниріне 4 команда қатысты.

Қазіргі таңда жастардың жан-жақты дамуы үшін пікірсайыс – маңызды құралдардың бірі саналады. Ол ойды жүйелі, нақты әрі қысқа жеткізуге үйретеді. Сонымен қатар, өмірге және қоршаған ортаға сын көзбен қарап, оның дамуына үлес қосуға ынталандырады. Сондықтан да, қазіргі жастардың пікірсайысқа оң көзқарасы қалыптасқан.
Пікірсайыс – белгілі ережелерге сәйкес қарсы тараптың өзінің ұстанымын қорғап, көпшілік алдында сөйлеу үдерісі. Бұл адамның ораторлық қабілеті мен ойлау жүйесін жетілдіруге ықпал етеді. Қатысушылар өз позицияларын қорғау барысында дәлелді пікір білдіруді үйренеді, ал сенімді әрі өтімді дәлел келтірген команда мүшелері жеңіске жетеді.
Нәтижесінде «Үздік спикер» кубогын Гүлназ Таңатқан жеңіп алды. Ал, барлық қатысушы командаларға арнайы мадақтамалар мен тәтті сыйлықтар табысталды. Сөз орайы келгенде, пікірсайыс турнирін өткізуде басшылық жасаған «Ақиқат» үйірмесінің жетекшісі Сарыбаева Алмагуль Абуовнаға алғысымызды білдіреміз. Алдағы уақытта жолдастық кездесулер өткізу жоспарда бар.

Саркын АБЕНОВА,
Айсары жалпы білім
беретін мектебінің аға тәлімгері,
Қостанай ауданы