Бос уақыт – босқа кетпейді

Балалар мен жасөспірімдердің бос уақытын мазмұнды өткізуді көздеген аула клубтары нәтижелі жұмыс істеп келеді. Бүгінде облыс бойынша 108 мыңнан астам бала қосымша біліммен қамтылып, бұл көрсеткіш жалпы оқушы санының 95,5 пайызын құрап отыр.
Оқушылардың шығармашылық қабілеттерін ашып, жан-жақты бағытта дамуына мүмкіндік беретін 3700 үйірме мен секцияға 72 мыңнан астам бала қатысуда. Жалпы облыс аумағында қосымша білім беретін 49 мекеме жұмыс істейді, оның 46-сы – мемлекеттік, 3-еуі – жекеменшік орталықтар. Балалар мен жасөспірімдердің қызықты, қауіпсіз демалысын ұйымдастыруда аула клубтарының орны ерекше. Қостанай өңірінде бүгінде 37 аула клубы жұмыс істейді. Оның ішінде 16 клуб тұрғын үйлердің ауласында орналасса, 21 клуб мектеп базасында ашылған. Қазіргі таңда аталмыш клубтарға 8933 бала мен жасөспірім тұрақты түрде қатысып жүр.
– Аула клубтарында сабақтар қазақ және орыс тілдерінде өткізіледі. Оларға 6-дан 18 жасқа дейінгі балалар қатыса алады. Клубтар аптаның жұмыс күндері сағат 12:00-ден 20:00-ге дейін ашық болады. Демалыс күндері жабық болғанымен, жаз мезгілінде де өз жұмыстарын үзбей жалғастырады, – дейді Қостанай облысы білім басқармасы басшысының орынбасары Данагүл Сүйіндікова.
Аула клубтарының басты мақсаты – балалардың бойындағы шығармашылық әлеуетті ашумен қатар өнер мен білімге деген қызығушылығын арттыру, бос уақытын пайдалы өткізуге үйрету және түрлі құқықбұзушылықтардан қорғау. Өкінішке қарай, әзірге ауылдық жерлерде мұндай клубтар ашылмаған. Дегенмен алдағы уақытта ауыл балалары да бос уақытын мәнді өткізетін орталықтарға қол жеткізеді деген үміт бар.

Б.Мейрамұлы,
Қостанай қаласы