Ғылыми жоба жүлдегерлері

Жуырда Амангелді аудандық білім беру бөлімінің ұйымдастыруымен ғылыми жобалар байқауы өтті. Дарынды жас ізденімпаз оқушыларды іріктеп, қолдау көрсету мақсатын көздеген байқауда мектебіміздің 4 оқушысы жеңімпаз атанды.

Дарынды балаларды анықтау, олардың ғылыми әлеуетін дамытуға және іске асыруға жағдай жасау мақсатында оқушылар арасында түрлі зияткерлік сайыстар, байқаулар, олимпиада және ғылыми жоба жарыстары ұйымдастырылуда. Осының арқасында шәкірттер жақсы жетістіктерге жетіп отыр. Осындай мәртебелі міндеттерін атқарып жүрген Амангелді жалпы білім беретін мектебі педагогтерінің ғылыми-зерттеу жұмыстарда оқушымен бірлесе атқарып келе жатқан жұмыстары өз нәтижесін көрсетіп келеді.

Ғылыми жобалар байқауында Жантөре Төлеубай «Ұлтына ұлы жеңіс сыйлаған спорт шебері – Бекзат Саттарханов Сейілханұлы» тақырыбындағы жұмысымен І орынға (жетекшісі: К.Аймағамбетов), Айсұлу Сапабекқызы «Үй жағдайында ұлуды өсірудің пайдасы» тақырыбындағы жұмысымен І орынға (жетекшісі: А.Досбергенова), Карина Жолдыбек «Солақайдың шежіресі» тақырыбындағы жұмысымен ІІ орынға (жетекшісі: А.Ержігітова), Кәусар Шөптібай «Асыл аға, ұлағатты ұстаз – Қабжалел Мұқатұлы» тақырыбындағы жұмысымен ІІІ орынға (жетекшісі: А.Арбабаева) ие болып, екі оқушымыз – Жантөре мен Айсұлу облыстық ғылыми жоба байқауына жолдама алды. Олар жобаларын, ендігі кезекте, облыстық ғылыми жобалар байқауында қорғайтын болады.

Дамудың даңғыл жолына бағыт алған болашағы баянды елдің өрісі қашанда білікті де саналы ұрпағымен кеңеймек. Өскелең жасты еліміздің тұтқасы етіп тәрбиелеу әрбір ата-ана мен мұғалімге байланысты. Ал, осы жауапкершілікті абыроймен атқару ардақты ұстаздарға жүктелген мәртебелі міндет.

Камшат АБДИКОВА,
Амангелді ЖББ орта мектебі
директорының ғылыми-
әдістемелік жұмыстар
жөніндегі орынбасары