Көңілді жазғы демалыс

Тоғыз айға созылған оқу жылы аяқталысымен, барлық мектеп оқушылары асыға күткен жазғы демалыстарын қызықты әрі пайдалы өткізуге тырысады. Бірі ауылдағы ата-әжесіне қыдырып кетсе, енді бірі жазғы лагерь мен демалыс алаңдарына барады.
Міне, көзді ашып-жұмғанша жазғы демалыстың жартысынан астам уақыты өте шықты. Иә, бос уақытты ұйымдастырудың жолдары көп. Тек жан қалауыңа қарай таңдау жасауың қажет. Қалалар мен облыс орталығындағы балаларға бос уақытты тиімді өткізуге баратын үйірмелер мен ойын-сауық орындары жетерлік. Ал, ауыл балаларына ойын-сауық орталығына барып, уақыт өткізуге мүмкіндік бола бермейді. Соған орай, біздің барлық мектептерде мектеп жанындағы сауықтыру алаңында мұғалімдер жұмыс істеуде.

Мен Қостанай ауданындағы Абай негізгі орта мектебінің жанындағы «Шаңырақ» лагерінің «Айгөлек» тобында шілденің 1-інен бастап 12-сі аралығында лагерьде өз жұмысымды бастадым. Мектеп жанандағы алаң бір ауысымда 10.00-ден 13.00-ге дейін жұмыс істеді. Ең бастысы, мектеп жанындағы лагерьлерге барлық балалар қатыса алады. Ал, лагерьге келген балалардың уақытын өзім барынша тиімді өткізуге тырыстым. Таза ауада түрлі ойын ойнап, мектеп ішінде суреттер сайысына қатысты, қолөнер бұйымдарын жасап, термомозайка мен бисермен жұмыс істеді.

Бір байқағаным, мұғалім өз тарапынан балаларды қаншалықты қызықтыра алса, соғұрлым лагерь келушілерінің қатары да арта түспек. Бір айдан соң, жазғы демалыс мәресіне жетіп, білім ордалары балаларға есігін айқара ашады. Үш айды ұмытылмастай өткізген олардың білімнің биік белестерін бағындыруға деген талпыныстары да жоғары болары хақ.

Айгерим ТАЙКЕНОВА,
Абай негізгі орта
мектебінің бастауыш
сынып мұғалімі,
Қостанай ауданы