Өзге тілді біл, өз тіліңді құрметте

Өзге тілді тез меңгеріп алатын қасиеті бар қазақ халқына өзінің тілін де төрге сүйреп, өзгелерге үйрететін кезі келгеніне де біршама уақыт болды. Болашақта қазақ тілінің беделі асқақтап, айбарынан жел есіп тұрса, әр қазақ үшін биік мәртебе емес пе?

«Ана тілін білмеген
Ақылы жоқ, желікбас.
Ана тілін сүймеген
Халқын сүйіп жарытпас», – демекші, өзіңнің ана тіліңе өзіңнен артық ешкім құрмет таныта алмайды. Қашанда қайда жүрсең де өзгені тіліңнің сұлулығына тамсандырып, таза сөйлеп, дәріптеп, қастерлеп жүргенге не жетсін?! Жамбыл жалпы білім беретін мектебінің тіл мамандары аталмыш тақырыптың аясында апталық өткізіп, тіл мен әдебиеттің майталман ұстаздары жоспарға сай бірқатар іс-шаралар өткізді.
Апталықтың алғашқы күнінен бастап қазақ тілі мен әдебиеті пәні бойынша Ж.Спанова «Аспан денелері», Ф.Мырзагалиева «Ғ.Мүсірепов. «Ұлпан» романы», Ж.Муханбетжанова «Қазақстан байлығы», Г.Ескалиева «Аққулар ұйықтағанда. Поэманың жанрлық ерекшелігі», М.Жабагина «Ұлттық ойындар», А.Агзумова «Тұңғыш ғалым», А.Ахметов «Т.Сұлтанбеков. «Көшпелі алтын» тақырыбында ашық сабақтар өткізді. Әрбір тіл маманы үзіліс арасында оқушылардың бос уақытын тиімді ұйымдастыру мақсатында «Көңілді үзілісте» түрлі ойындар ойнатып, қызықты тапсырмалар ұйымдастырды.
Аталған апталық аясында қазақ тілі мен әдебиеті оқу кабинетіне де жаңаша үлгіде бүгінгі күннің талабына сай ұлттық құндылықтарды дәріптеуге негізделген безендіру жұмыстары да жасалды. Алғаш оқу бөлмесіне кірген білім алушылардың да алған әсері айтарлықтай көзді қуантты. Тек оқушыға ғана емес, пән мұғаліміне де, білім ордасына да барынша қолайлы орта құрып, ыңғайлы жағдай жасаудан еш жалықпайтын ұстаздардың да еңбегі еленері сөзсіз.

Жазира МИЗАМХАНҚЫЗЫ,
Жамбыл ЖББМ
директордың оқу-тәрбие
ісі жөніндегі орынбасары,
қазақ тілі мен әдебиеті
пәнінің мұғалімі,
Қостанай ауданы