Саламаттылық – салтымыз!

Ата-ана, оқушы және мектеп үштік одағын арттыра отырып, қарым-қатынастарын нығайту мақсатында Мичурин жалпы білім беретін мектебінде бастауыш сынып оқушылары және ата-аналары арасында «Толағай» спорттық сайысы өтті.

Оқушылар мен олардың ата-аналарына спорттық ойындарды орындата отырып, саламатты өмір салтына деген қызығушылықтарын арттыру, ойын кезінде өзін-өзі бақылау арқылы белсенділікке, сенімділікке, қайсарлыққа, батылдыққа, ұйымшылдыққа, әділдікке, жолдастық сезімге, ойынды жетілдіруге баулу көзделді. Балаларға денсаулықтың қадірін, бағалы байлық екенін және оны сақтаудың жолдарын түсіндіру де назардан тыс қалмады.
Сайысқа 1 «Ә» сыныбынан Досмұхамбеттер отбасы, 2 «Ә» сыныбынан Кәдірбайлар отбасы, 3 «Ә» сыныбынан Абусагитовтар отбасы, 4 «Ә» сыныбынан Испановтар отбасы белсене қатысты. Сайыс өте қызықты әрі көңілді өтті. Бақ сынасқан әр отбасы, ұпай санына сай номинациялармен және тәтті сыйлықтармен марапатталды. Спорттық жарыс барысында арқан тарту, асық ату, күш сынасу сияқты ұлттық құндылықтар мен ұлттық ойындар жүргізіліп, сайыс соңында барлық қатысушылар мен жанкүйерлер «Қара жорға» биін билеп, жарысты көңілді аяқтадық.

Асем КУЗЕМБАЕВА,
Мичурин ЖББМ
бастауыш сынып
мұғалімі,
Қостанай ауданы