Қостанай қаласындағы №28 мектеп-гимназиядағы 3-тоқсанның алғашқы оқу аптасы жемісті басталды. «Біртұтас тәрбие бағдарламасы» аясында 1 «В» сыныбында «Әжемнің ертегілері» жобасы бастау алып, ашық сыныптан тыс іс-шара болып өтті.
Жобаның мақсаты – ертегілер еліне саяхат жасау арқылы балалардың тілін, сөздік қорын молайту. Ой-өрісін, сана-сезімін жан-жақты дамыта отырып, баланың бойына озық әдет-ғұрып, салт-дәстүрлерді сіңіретіндей, имандылыққа, ізгілікке тәрбиелеу. Осы көзделген мақсатты негізге ала отырып, Балдырған әжеміз «Қоянның жаралуы» атты, ал Сара әжеміз Ы.Алтынсариннің «Әке мен бала» ертегісін балаларға айтып берді. Ұлттық киім киіп, дәстүрімізді жаңғыртып жатқан 1 «А», 3 «А» және 4 «А» сынып оқушылары қонақ болып келіп, қызыға ертегі тыңдады.
Бұл жоба балалардың ертегілер туралы түсініктерін бекіте отырып, әңгімелеуге ғана үйретіп қоймай, олардың эстетикалық талғамын, білімін, сөйлеу мәнерін, қызығушылығын артыратыны анық. Арнайы жоспар бойынша бекітілген күндері сынып жетекшілері іс-шара ұйымдастырады. Сондай-ақ, санитарлық-эпидемиологиялық талаптарды сақтай отырып, жобаның өз дәрежесінде өтуіне ата-аналар да атсалысуда. Жасалып жатқан іс-шаралар балалардың көңілінен шығып, әр кезекті ертегіні олар қызығушылықпен әрі асыға күтеді.
Ұлттық құндылықтарымызды әрмен қарай насихаттау жолында Балдырған әжеміз балаларға «Кілем тоқу» өнерінен шебер-сынып өткізгенін ерекше атап өтсек ләзім. Тоқыма өнері – қазақ халқының ежелден келе жатқан, ең алғаш киімі мен үй жабдығының негізі болған қадірменді өнер түрі. Балдырған әженің тілге тиек етіп айтқан әрбір сөзі арқылы бұл өнердің ұрпақтан-ұрпаққа жалғасып келе жатқан қазынамыз екенін аңғаруға болады. Әжеміз тоқыманы жастайынан анасынан үйреніп, қазіргі таңда өз балаларымен бірігіп отбасылық кәсіпке айналып отыр екен.
Балдырған әженің тоқыған кілемдері елордамыз Астана қаласындағы ЭКСПО-да сатылымға шыққан екен. Ол кілемдер бұрындары қабырғаға іліп, еденге төсеп, үйдің жылуын сақтау үшін пайдаланылса, кейіннен сәндік бұйым ретінде қолданылуда. Оқушылар тоқуға қажетті керек-жарақтармен танысып шықты. Оларға ең қызықты болғаны – өнердің бұл түріне бір табан жақындап, өз қолдарымен тоқып көргендері. Ұлдар да қызығып, шеберліктерін көрсетті. Осындай тағылымы мол іс-шаралар балалардың бойында тек ізгіліктің лебін естіретініне сенімім мол.
Жұлдыз ЖИЛКАЙДАРОВА,
№28 мектеп-гимназиясы
бастауыш сынып мұғалімі,
Қостанай қаласы