Ыбырай мектебіндегі тартысты дода

Ыбырай Алтынсарин атындағы мамандандырылған мектеп-гимназия-интернатында салауатты-эстетикалық әдістемелік бірлестігінің ұйымдастыруымен «Өмірге саламатты қадаммен» атты апталық аясында мектепішілік волейбол турнирі өтті.

Саламатты өмір салтын насихаттауды көздеген аталған додаға ата-аналар мен ұстаздар қауымы белсене қатысты. Жарыстың ережесіне сай, әр сыныптың ата-аналарынан құралған командалар құрамында 4 ер адам мен 2 әйел адам өнер көрсетіп, оларға мектеп мұғалімдерінің құрамасы лайықты бәсекелес болды. «Адал азамат» бағдарламасы мен Ата-аналарды педагогикалық қолдау орталығының жұмыс жоспары аясында өткен бұл іс-шара мектеп пен отбасы арасындағы алтын көпірді нығайтып, бала тәрбиесіндегі ортақ мүддені паш етті.

Мұндай кездесулер тек спорттық бәсеке ғана емес, ата-аналардың өзара танысып, эмоциялық серпіліс алуына және өскелең ұрпаққа жеке үлгі-өнеге көрсетуіне мүмкіндік туғызды. Әсіресе, жарыс бойы табандылық танытқан ата-аналары мен ұстаздарына ерекше қолдау көрсеткен 5-сынып оқушыларының жанкүйерлік рухы ойын көрігін қыздыра түсті. Тартысты өткен бәсеке нәтижесінде мұғалімдер командасы жеңіске жетсе, жүлделі екінші орынды – 5-сынып, үшінші орынды – 10-сынып ата-аналары өзара бөлісті. Сонымен қатар ерекше ойын өрнегін көрсеткен қатысушылар «Ең үздік ойыншы» және «Ең үздік қорғаушы» номинацияларымен марапатталды.
Додадан кейін де ата-аналар қауымы өздерінің жағымды әсерлерімен бөлісіп, мектеп өміріне мұндай белсенді араласудың маңыздылығын атап өтті. Мектеп пен ата-ананың ынтымақтастығын арттырған бұл маңызды қадам алдағы уақытта да игі дәстүр ретінде жалғасын таба бермек.

Гүлнәз ӨМІРЗАҚ,
Аружан ҚОНАҚБАЕВА,
А.Байтұрсынұлы атындағы
ҚӨУ журналистика
мамандығының
4-курс студенттері