Ұлттық тағамдар көрмесі

Қазақтың дастарханындағы ұлттық тағамдар денсаулыққа өте пайдалы. Сан ғасырдан жалғасып келе жатқан дәстүрлі ас мәзірін бүгінгі ұрпаққа жеткізу мақсатында А.Қоңқабаев атындағы ЖББ мектебінде 5–11-сыныптар арасында ұлттық тағамдар көрмесі өткізілді.

Көрмеге қазақтың ұлттық тағамдарының ең негізгісі – ет тағамдары, сүт тағамдары және ұн тағамдарының ерекше түрлері қойылды. Ұлттық тағамдардың ұлттық нақышта ағаштан жасалған арнайы ыдыстармен қойылғаны көрменің сәнін кіргізді. Ата-ана мен мектеп арасындағы тығыз байланыстың нәтижесінде барлық оқушылар ұлттық құндылықтарымызды бойына сіңіріп жатыр деп толық айта аламыз. Оның дәлеліндей болған осы көрмеге ата-аналар мен ұстаздардың еңбегі өте зор болды.

Оқушыларымыз да жан-жақты ізденіп, көрмеге қойылған ұлттық тағамдарымыздың жасалу жолы, құрамы, маңыздылығын таныстырып өтті. Оқушылардың барлығы іс-шараға ұлттық киіммен қатысып, молынан жайылған қазақтың бай дастарханынан дәм татты. Әр ұрпақтың бойында «Мен қазақпын!» деп мақтанышпен айтып отыратындай әсер қалдыратын ұлағатты іс-шараларды өткізіп отыру – ұстаз ретіндегі парызым деп білемін. Ұлттық құндылықтарымыз ешқашан жоғалмасын, керісінше бірлесе дәріптеп, ұрпақтан-ұрпаққа қастерлеп жеткізейік.

Айгүл САТАЕВА,
А.Қоңқабаев атындағы
ЖББМ директорының
тәрбие ісі жөніндегі
орынбасары,
Жангелдин ауданы,
Ақкөл ауылы