Жас мамандар бақ сынасты

Б.Майлин атындағы №7 мектеп-гимназиясында «Мұғалім сымбаты» атты серіктес мектептер арасындағы байқау ұйымдастырылды. Жалпы 11 жас маман қатысқан байқауда біздің №13 ЖББ мектебінен екі жас маман бақ сынадық.

Аталмыш байқау педагогтік қызмет аясында оқушы, ата-ана және әріптестермен сыпайылық, кішіпейілділік, толеранттық таныту, сондай-ақ ортақ мүддеге жеткізетін икемді қарым-қатынас жасауды көздеді. Ең бастысы, мұғалімдердің бойында жасырынып жатқан дарынды анықтауға мүмкіндік берді.

«Таныстыру» (визит карточкасы), «Менің қиялымдағы мұғалім сымбаты» және педагогикалық жағдаяттарды шешу кезеңдерінен тұрған байқау жоғары деңгейде өтті. Қатысушы жас мамандар үшін бұл байқау тәжірибе алмасып, жаңадан таныстық орнатуда, ең бастысы бұл күнгі дұрыс «Мұғалім сымбатын» қалыптастыруда үлкен рөл атқарды.

Тартысты байқау нәтижесінде мектебіміздің атынан қатысқан Айнұр Жанабаева «Ұшқыр ойлы жас маман» номинациясына ие болса, мен 3-орынды иелендім. Педагог мұраттарының бірі – баланың үнемі даму үстінде болатынын ұмытпау және оны жазалауға асықпау. Ұстаз баламен шынайы құрметке лайық қарым-қатынас құра білсе ғана үлкен табыстарға қол жеткізе алады.

Аян СЫБАН,
№13 ЖББ мектебі
директорының тәрбие ісі
жөніндегі орынбасары,
тарих пәнінің мұғалімі,
Рудный қаласы