Жастардың көзқарас алаңы

«Денсаулық – зор байлық» демекші, бүгінгі таңда балалардың денсаулығын қорғау үшін екпенің маңыздылығы жиі талқыға түсуде. «Балаларға екпе салу міндетті болуы тиіс пе?» деген сұрақ төңірегінде Амангелді ЖББМ оқушылары пікірлерін білдірді.

Ең алдымен, білім ордасының медбикесі Тәттігүл Қабдығұлқызы мен мектептің дебат минстрі Аруна Бекзадақызы өзекті мәселелері талқылап қана қоймай, дәлелді пікірлерін таныстыра білді. Мектеп медбикесі: «Вакцинация арқылы көптеген қауіпті аурулардың алдын алуға болатыны ғылыми тұрғыда дәлелденген. «Сақтықта қорлық жоқ» дегендей, екпе – балаларды жұқпалы дерттерден қорғаудың ең тиімді жолы. Дегенмен, кейбір ата-аналар бұған қарсы, себебі олар таңдау құқығы мен жеке сенімдерін алға тартады», – деп ойымен бөлісті.

Артынша БП «Мектеп оқушыларына екпе салу міндетті болу керек деп есептейді» тақырыбы аясында мектептің 6–8-сынып оқушылары арасында дебат ұйымдастырылып, қоғамның пікірін екіге бөлген бұл мәселе қызу талқыланды. Іс-шара оқушылардың сыни ойлау қабілетін арттырып қана қоймай, олардың денсаулық сақтау мәселелеріне деген көзқарастарын қалыптастыруға ықпал етті. Бұл – дебаттың бірден-бір артықшылығы болса керек.

Оқушылар дебат барысында өз пікірлерін еркін білдіріп, өзекті тақырыпқа терең үңілді. Осынау ой мен ойын алаңы оқушылар арасында білім алмасудың және жауапты шешімдер қабылдаудың маңыздылығын түсінуге мүмкіндік берді. Бұл тәжірибе олардың азаматтық белсенділігін дамытуға және қоғамдық маңызы бар тақырыптарға бей-жай қарамауға үйретті. Яғни, жастарды қоғамдағы өзекті мәселелерді түсініп, белсенді азамат болуға тәрбиелейді.

«Кеңесіп пішкен тон келте болмас» дейді халық даналығы. Ендеше, екпе салуды міндеттеу саясаты барлық тараптардың пікірін ескеруді талап етеді. Жауапкершілік тек дәрігерлерде немесе ата-аналарда ғана емес, жалпы қоғамда екенін ұмытпауымыз қажет. Балалардың денсаулығы – ортақ құндылығымыз.

Бақытгүл УАТҚАНОВА,
Амангелді ЖББМ«Зияткер» дебат
үйірмесінің жетекшісі