Демалыс пен достық мекені

Жаз – оқушылар үшін тек демалыс емес, үш тоқсан бойғы еңбектен кейінгі еркін тыныс, шытырманға толы қызықты шақ. Күн шуағына бөленген маусымда балаларға арналған лагерьлердің маңызы ерекше.

Лагерь – тек ойын мен демалыс орны емес. Ол – бала бойындағы шығармашылықты оятатын, жауапкершілік пен ұқыптылыққа үйрететін орта. Түрлі үйірмелер, спорттық жарыстар, ән-би кештері, табиғат аясындағы экскурсиялар – мұның бәрі баланың жан-жақты дамуына ықпал етеді. Жаңа достар тауып, бейтаныс ортаға бейімделуді үйреніп, әрбір оқушы өзін жаңа қырынан тани бастайды. Әсіресе мұғалімдер мен тәрбиешілер ұйымдастыратын шеберлік сабақтар мен топтық ойындар балалардың көңілінде ұзақ сақталып, тәрбиелік мәні жоғары іс-шараларға айналады.
Мұғалімдер үшін де бұл – шәкірттермен бейресми жағдайда жақын араласуға, педагогикалық қарым-қатынасты нығайтуға таптырмас мүмкіндік. Таңғы жаттығу, бір үстел басындағы ас, кешкі әңгіме – бәрі ұзаққа сақталатын естеліктерге айналады. Дегенмен лагерь өмірі тек қызық пен ойыннан тұрмайды. Қауіпсіздік пен тәртіптің сақталуы аса маңызды. Балалар тәрбиешілердің нұсқауын тыңдап, белгіленген тәртіпті сақтауы қажет. Жеке гигиена, табиғаттағы жүріс-тұрыс, медициналық көмекке дер кезінде жүгіну – денсаулық кепілі. Ал егер бала лагерьдегі сәттерін естелікке айналдыру үшін шағын күнделік жүргізіп отырса – бұл оның өз ойын қалыптастыруға көмектесіп, жазу машығын дамытуға сеп болады.
Жазғы лагерь – балалық шақтың жарқын беттері, жүректе сақталатын жылы сәттер, достық пен жаңа әсерге толы өмір мектебі. Сондықтан әр ата-ана баласының осындай мүмкіндікке ие болуына жағдай жасап, әрбір мұғалім оны тәрбиелік мәні жоғары тәжірибеге айналдыра алса – бұл нағыз табыс болмақ.

Аружан АНИСОВА,
ҚӨУ студенті