Ертегілер әлеміне саяхат жасалды

Б.Қолдасбаев атындағы мектептің «Балақай» қуыршақ үйірмесі мен «Шұғыла» балалар мен жасөспірімдер орталығы жанынан құрылған «Дарын» драма үйірме жетекшілерінің ұйымдастырумен 2-5 сыныптар арасында «Ертегілер әлемі» атты театрлық қойылымдар сайысы өтті.

Республикалық «Балалар және театр» ағартушылық жобасы аясында ұйымдастырылған сайыс екі тілде өтті. Қатысушылардың өнеріне мектеп тәмімгері Мадина Рахымбекқызы, қазақ тілі мен әдебиеті пәнінің мұғалімі Әлия Валентинқызы, «Балақай» қуыршақ театры үйірмесінің жетекшісі Роза Серікқызы қазылық етті. Сайысқа жалпы 14 команда қатысып, ертегілік қойылымдар сахналанды. Қазылар алқасы тарапынан жас әртістердің сахна мәдениетін сақтауы, сахналық киімі, образды бейнелеу шеберліктері сараланып, ерекше көзге түскен оқушылар арнайы дипломдармен марапатталды.

Байқау нәтижесі бойынша 1-3 сыныптар арасында «Үш аю» ертегісін сахналаған 3 «Г» сыныбы жүлделі І орынды иеленсе, ІІ орынды «Шалқан ертегісін» қойған 2 «В» сыныбы, ІІІ орынды «Репка» ертегісімен сынға түскен 2 «А» сыныбы, «Волк и семеро козлят» ертегісі бойынша 3 «А» сыныбы және «Бауырсақ» ертегісімен көзге түскен 3 «В» сыныбы иеленді. Ал 4-5 сыныптар бойынша 1-орынды «Алдар көсе» ертегісімен 5 «Г» сыныбы, 2-орынды «Алдар көсе мен Шық бермес Шығайбай» ертегісімен 4 «Б» сыныбы, ал 3-орынды «Жақсылық пен Жамандық» ертегісімен 5 «Б» сыныбы иеленді.

Әнет ЖҰМАБЕК,
Амангелді ауданы