Көңілді әрі қызықты демалыс

Жаз айлары – мектеп оқушылары үшін ерекше ықыласпен күтілетін уақыт. Жыл бойы сабақ барысындағы тоқсандық демалыстар болғанымен, жаз кезіндегі демалыс балаға сүйікті ісімен айналысып, еркін демалуына ерекше мүмкіндік береді.

Жаз мезгіліндегі уақыт балалардың негізгі сабақтан босап, қызығушылығымен айналысуына, шығармашылықпен жұмыс істеу қабілетін арттыруға, достарымен емін-еркін қатынас жасап, еркін ойнауға мүмкіндік береді. Бұл шараларды балалардың күндіз келіп демалатын жазғы лагері іске асырады десек те болады.
Дәстүрлі Халықаралық балаларды қорғау күнімен қатар мектеп жанындағы «Айгөлек» жазғы лагері өз жұмысын қызу бастап кетті. Биылғы бастауыш сынып оқушылары үшін қызыққа толы жазғы демалыс ерекше өтуде. Тәрбиешілер Н.Айтжанова, Г.Бекентаева және Л.Сұлтанғалиева – бастауыш сынып мұғалімдері, көп жылдық тәжірибесі бар білікті мамандар. Оқушылармен жұмыс істей отырып, баланың бойындағы ерекше қабілеттерді шыңдап келе жатқан тәжірибелі ұстаздар. Арнайы құрылған жоспарға сай көптеген қызықты іс-шаралар өткізіліп келеді.
«Айгөлек» жазғы лагерінің ашылу салтанаты, «Рәміздер күні», «Саламатты өмір салты күні», «Достық күні», «Отбасы күні», «Ұлттық құндылықтар күні» іс-шараларын ерекше өткізді. Күн сайын оқушылар түрлі қызықты шараларға қатысып, ерекше көңіл-күйде болды. Оқушылардың болашағына бағыт-бағдар беру, сүйікті мамандықтарын таңдай білуге жағдай жасау мақсатында «Мамандықтар әлемін ашамыз?» ойын сабағы өткізілді. Бүлдіршіндер өздері қандай мамандықты сүйетіндерін ортаға салып, арман-мақсаттарын айтып берді. «Айгөлек жұлдыздары» атты өнер байқауына қатысқан балалардың ерекше қабілеттері ашылып, әнші, биші, көркем сөз шеберлері, қолөнер шеберлері анықталды.
Баланың дара қасиетін ашу, шығармашылықпен жұмыс істеу арқылы тұлғаның даралығын ашу – ұстаздар үшін ең басты қасиет. «Айгөлек» жазғы лагеріне тәжірибе жинақтауға келген болашақ ұстаздар – Г.Мұхтар мен Г.Қабдуаит – жан-жақты ізденіп, жаңашылдықпен көзге түсіп келеді. Өз кезегінде, олар балалармен жұмыс істеудің қыр-сырын меңгеріп, білгендерін үйретуге ерекше ықылас танытуда. Жазғы уақытта жеткіншектердің ерекше демалысын ұйымдастырып отырған тәрбиешілермен қатар болашақ педагогтерге де шығармашылық табыс тілейміз.

Айгуль САТАЕВА,
А.Қоңқабаев атындағы
ЖББМ тәрбие ісі жөніндегі орынбасары,
Жангелдин ауданы