«Шебер қыз-2022» байқауы өтті

«Шебердің қолы алтын», – дейді атам қазақ. Осы орайда «Шұғыла» балалар мен жасөспірімдер шығармашылық орталығының «Шебер қолдар» үйірмесінің жетекшісі Айсауле Сейдинаның ұйымдастыруымен «Шебер қыз-2022» байқауы өтті.

Сөзге де шебер, іске де ұста халқымыздың мәдениеті мен өнерін паш ететін құндылықтардың бірі – оның қолөнері. Көз жауын алатындай бұйым жасап, асыл тастардан сән бұйымдарын соққан халық шеберлерінің ісі мақтауға тұратын өнер туындысы деп білемін. Мақсаты – келешек ұрпаққа қазақ халқының ұлттық өнерін дәріптеу, оқушылардың өздігінен ізденіп, ұмыт болып бара жатқан өнерін қайта жандандырып, оның шығу тарихын өз қолдарымен жасап, сәндік қолданбалы өнерді қайта жаңартуға баулу.

«Шебер қыз-2022» байқауы төрт кезеңнен тұрды. Алғашқы таныстыру кезеңінде әр қатысушы өздерін таныстырса, екінші кезеңде қатысушылар ән шырқап, би билеп, т.б. өнерлерін көрсетті. Үшінші кезеңде қатысушылар қолдан жасалған киімдерімен сән үлгісін көрсетті. Төртінші кезең – «Шебердің қолы алтын» деп аталды. Онда қатысушылар қағаздан, бисерден, матадан, т.б. заттарын әкеліп, сол жерде жасап көрсетеді.

Сайысқа оқушылар өте жоғары деңгейде дайындалған. Нәтижесінде бас жүлдені Айзере Кенжеғали, 1-орынды Айда Дінмұханбетқызы мен Айнұр Айтуар, 2-орынды Ақсауле Түркен мен Айзере Бақытбек, 3-орынды Кәусар Бейсенғали, Айзере Төлеубаева және Сезім Серік теңдей бөлісті. Жеңімпаздарға арнайы дипломдар мен естелік сыйлықтар табыс етілді.

Әнет ЖҰМАБЕК,
«Шұғыла» БЖШО,
Амангелді ауданы