Сырбай – сыршыл ақын

«Станционный» кітапхана-филиалынның қызметкерлері ақын Сырбай Мәуленовтың туғанына 100 жыл толуына орай №15 мектептің 7 «А» сыныбының оқушыларына «Сырбай Мәуленов өлеңдеріндегі сыршыл сезім» атты әдеби сағат өткізді.

Сырбай Мәуленов тек өз мектебі бар ақын ғана емес, қазақ поэзиясын жарқыраған жаңа кезеңге көтеріп бере алған кемел құбылыс. Сырбай – қазақтың ұлттық әдебиетінің классигі. Өлеңдерінің ерекше бір қасиеті: ол ойын лирикалық герой арқылы, көбінесе өз атынан сөйлейді, өз қатынасын, өз көзқарасын, өз сезімін толғайды. Осындай деректерді келтіре отырып, кітапханамыздағы іс-шара барысында кітапханашы оқушыларды қаламгердің өмірбаянымен, шығармашылығымен таныстырды.

Сырбаз сыршылдық пен сымбатты суреткерлік өлең өрнегі, ақынның соғыс тақырыбындағы толғаныстары мен табиғат бояуларын өзек еткен жырлары оқырмандарды бірден баурап алды. Іс-шара аясында кітапханашы «Сырлы өлең Сұлтаны» атты кітап көрмесін ұсынды, оқушылар ақынның өлендерін оқыды, викторина сұрақтарына жауап беріп, «Сырбай Мәуленовтің өмірі мен шығармашылығы» атты бейнероликті тамашалады. Сырбай Мәуленовтың әдебиет әлемінде алар орны зор. Оның сырға толы өлеңдері мәңгі халықтың жүрегінде.

Мөлдір БАЖИРОВА,
«Станционный» кітапхана-
филиалының кітапханашысы,
Қостанай қаласы