Тіл білгеннің қашанда ұтары мол

Қазіргі уақытта үштілділік біздің ел үшін қағидат болып кетті десек, артық айтпаспыз. Тіпті, заман ағымына қарай адамдар қызметтік саласына, өмірдегі жетістіктеріне байланысты неғұрлым көп тіл үйренуге құштар.

«Тілдарын» облыстық тілдерді оқыту орталығы соған бірден-бір дәлелі деуге болады. Біздің орталықта, әрине, ең алдымен мемлекеттік тілге ерекше зейін қойылып, оқытылады, сонымен қатар ағылшын тілін оқыту да назардан тыс қалған жоқ. Ағылшын тілі курстарына тоқталар болсақ, орталықта ағылшын тілінің бекітілген бағдарламасына сәйкес бастапқы A1 «Beginner» және базалық A2 «Elementary» деңгейлерінің әрқайсысы бір жылдан 100 сағат көлемінде топтар арасында оқытылады. Биыл, міне, ағылшын тілінің базалық деңгейі бойынша 53 тыңдаушы курсты сәтті аяқтап, сертификаттарын алды.
Тыңдаушылардың қатырында мемлекеттік мекеме, бюджеттік сала қызметкерлері және де өтініш білдірген қала тұрғындары қамтылған. Соның ішінде, атап айтатын болсақ, Қостанай облысының Жер ресурстарын басқару департаменті басшысы Оспанов Кайрат Темирханович пен Полиция Департаментінен Куандыков Айдын Амиржанович сияқты тыңдаушыларды «Үздік тыңдаушы» ретінде ерекше атап өтуге болады. Жыл өткен сайын ағылшын тілін оқимын деп, ынта білдірушілердің саны артып келеді, осыған орай біздің орталықта тыңдаушылар үшін барлық жағдай жасалған. «Үйренемін» деген ынталы жандарға бұл – таптырмас мүмкіндік болары анық.

Асем КАСЫМОВА,
«Тілдарын» облыстық
тілдерді оқыту орталығының
ағылшын тілі оқытушысы,
Қостанай қаласы