Ұлттық мұра – асыл қазына

Облыс орталығындағы «Станционный» кітапхана-филиалында «Сән және дәстүр: ұлттық киім» атты іс-шара өтті. Оған қаламыздағы №15 орта мектептің оқушылары қатысты.

Шара барысында қатысушыларға халқымыздың ұлттық киімдері жайлы ақпарат беріліп, тақырып аясында презентация мен бейнематериал көрсетілді. Оқушылар кітапхана қызметкеріне қызықтырған сұрақтарын қойып, тұшымды жауаптарын да ала білді. Одан бөлек, тағылымды жиында №15 орта мектептің 3-сынып оқушылары қазақтың қара домбырасында күмбірлетіп күй шертті.

– Ұлттық аспабымызда ойнауды 7 жасымнан бастап үйрендім. Қазіргі уақытта 20-дан астам күйді білемін. Домбырада ойнағанды жақсы көретінім соншалық, домбыра туралы, қазақтың ұлттық киімдері, салт-дәстүрлері жайында көп білгім келеді. Тақырыпқа қызығып, кітаптардан көп оқып, ізденіп жүремін. Сондықтан да кітапхана төрінде болған шараға қатысқаныма қуаныштымын, – дейді «Нағыз қазақ – қазақ емес, нағыз қазақ – домбыра» деген ұстанымдағы Мағжан Нұрсұлтан.

Артынша сөзін жалғап: «Аталған шарада досым Қасым екеуміз Нұрғиса Тілендиевтің «Әлқисса» күйін орындадық. Кітапхана менің үйімнің қасында болғандықтан, жазғы демалыс уақытында босқа жүрмей, қызықты кітаптарды алып, оқитын боламын», – дейді ол.

Мөлдір БАЖИРОВА,
«Станционный» кітапхана-
филиалының кітапханашысы,
Қостанай қаласы