Жаз қызығы бізбенен

Арқалық қаласындағы №10 жалпы білім беретін мектеп жанынан құрылған «Күншуақ» жазғы демалыс лагерінің «Зеленая планета» үйірмесі ұйымдастырған «Экологиялық ізденіс» квест ойыны өтті. Оған қаламыздағы сегіз мектептің оқушылары қатысты.
Аталмыш ойын жасыл сана мен экологиялық мәдениетті қалыптастырудың алаңына айналды. Қатысушылар әртүрлі станцияларға барып, табиғатқа қатысты сұрақтарға жауап беріп, логикалық тапсырмалар орындап, шығармашылықтарын көрсете білді. Ең бастысы – олар командамен жұмыс істеп, бір-біріне көмектесе отырып, квест ойынын қызықты әрі көңілді өткізді.

Сайыстың әділ қазылар алқасының құрамында Қосымша білім беру орталығының ұстаздары Тонашина Жазира Қуанышқызы, Жанаева Камшат Алмухановна және мектебіміздің мұғалімі Комарова Ольга Николаевна болды. Ойын ережесіне сәйкес «Білгенге маржан», «Қара жәшік», «Гүлдер әлемі», «Құстар әлемі», «Экобәйге» секілді станцияларда спорттық квест ойындары өткізілді. Ойын барысында орман кейіпкерлері балалармен бірге флешмоб ұйымдастырды. Әділ қазылар алқасының шешімі бойынша Кейкі батыр атындағы №4 мектеп 72 ұпаймен 1-орынға ие болса, №2 мектеп 57 ұпаймен 2-орынға, Абай Құнанбаев атындағы мектеп-гимназиясы 54 ұпаймен 3-орынға табан тіреді.
Атсалысқан мектептер белсенділігі үшін мақтау қағаздарымен және тәтті сыйлықтармен марапатталды. Қатысушылар тек жарысып қана қоймай, табиғатты қорғаудың маңызын да түсіне білді. Балалар ойынға белсене қатысып, көтеріңкі көңіл-күймен үйлеріне оралды.

Батырхан КАРАШИНОВ,
Жанар ӘБІШ,
«Сиқырлы қылқалам»
үйірмесінің жетекшілері,
Арқалық қаласы